Lebih 22,000 tiket bilun tambang tetap AirAsia dijual nyerumba Aidilfitri
LIMBANG: Kompeni penerebai AirAsia nyendiaka lebih 22,000 endur duduk tambang tetap ungkup penerebai jauh malam entara Semenanjung, Sabah enggau Sarawak nyerumba pengerami Hari Raya Aidilfitri ti deka datai.
Sapit Menteri Pengangkut Malaysia, Datuk Hasbi Habibollah madahka, inisiatif nya sebagi ari komitmen kompeni nya awakka mayuh agi orang ulih pulai ke menua diri berami nyengkaum rayat di Sabah enggau Sarawak.
“AirAsia bejalaika inisiatif kediri empu nambah penerebai malam enggau ti bukai, sereta bisi 22,000 endur duduk ti dijual ke Sabah enggau Sarawak.
“Tu asil dipejalaika AirAsia kena nentuka semua orang ulih pulai ke menua diri ngintu Hari Raya, nya mega atur kena nentuka maya hari pengerami nya rega tambang nadai ditikika,” ku iya lebuh dirandau raban pengarang berita pengudah nyuaka Outright Grant (OG) di Masjid Baitul Iman apin lama.
Sama bisi datai, Pegawai
Opis Pelilih Menua Limbang Sulaiman Engal.
Hasbi bejaku baru madahka, tiket bilun nya udah ulih dibeli berengkah 4 Mac apin lama sereta sida diperansang meli tumu ngambika ulih meli ngena rega murah agi enti dibandingka enggau rega tiket ba hari biasa.
Ku iya , rayat Sarawak ke di Semenanjung sereta deka pulai ke menua berami Hari
Raya patut ngelanggur tumu enggau bebeli tiket tumu agi.
Dalam timpuh ti sama ku iya, sida ti deka pulai ke menua diri ngena jalai raya nyerumba Aidilfitri tu diperansang ngelanggur pejalai enggau likun.
Ku iya, mensia mayuh mega patut sebana ngagai ejensi penerit adat baka Lembaga Pelesenan Kenderaan
Perdagangan (LPKP) Sarawak enggau Jabatan Pengangkutan Jalan (JPJ) nyema bisi tetemuka orang bejualka tiket bas ngena rega mar tauka enda patut.
Ba program nya bisi 62 pengari nerima geran ti nyengkaum 10 masjid enggau 52 surau di Parlimen Limbang enggau penyampau ungkup belanja sepenyampau RM196,000.