Lim: Chara tulung SARA diperunding diubah manah agi
KUALA LUMPUR: Perintah deka ngubah manah agi chara bantu Program Sumbangan Asas Rahmah (SARA) kelimpah ari berunding ngerembaika bantu nya dudi hari, ku Sapit Menteri Pekara Wang, Lim Hui Ying.
Lim madahka nya laban bepelasarka timbal ari pemegai taruh enggau penerima, SARA udah mayuh nguntungka sida lebih agi nya bantu diberi beselinting ngagai raban seranta enggau balat seranta bulih barang ke udah diungkupka.
“Tu (SARA) bebida ari subsidi pukal laban SARA ulih nyeliahka ari pantis sereta diberi ngagai penerima ti dikelala enggau ke patut aja,” ku iya maya sesi tanya saut ba Dewan Rakyat kemari.
Iya nyaut tanya tambah ari Sim Tze Tzin (PH-Bayan Baru) ti deka nemu chara perintah dalam nentuka ngambika semua raban ti ditagit ke patut nerima SARA enda tinggal ari bantu tu.
Nitihka Lim, nyema rayat ngasaika penatai pemisi sida ari baruh tikas garis penyeranta (PGK) nasional, nya alai sida diperansang ngerejista dalam sistem e-Kasih ti dijaga Unit Penyelarasan Pelaksanaan, Jabatan Perdana Menteri (ICU JPM) kena nentuka
nadai tinggal ari inisiatif bantu ari perintah.
“Dalam timpuh ti sama, peminta Sumbagan Tunai Rahman (STR) mega dibuka sepemanjai taun kena meri peluang ngagai penerima ke patut ngambi berundingka baru laban pengulih nerima SARA iya nya semina diberi ngagai penerima ti bulih STR ti bestatus seranta tauka balat seranta,” ku iya.
Ngenang chara meri bantu SARA ungkup Semenanjung, iya madahka sepenyampau RM100 sebulan diberi ngagai ruang bilik enggau orang tuai ti nadai laki tauka bini ti nerima RM1,200 penyampau semua, lalu RM50 sebulan ngagai bujang dara enggau penyampau semua bantu
RM600.
“Ia diberi ngena chara automatik nengah akaun ti dibuka ngena MyKad penerima awakka penerima SARA ulih meli barang runchit ke dikena tiap hari ari baruh kategori produk ti dikemendarka palan bebeli barang enggau kedai runchit ti dipilih serata menua ngena MyKad.
“Lalu Saban, Sarawak enggau Labuan, bantu SARA deka diberi dua kali setaun iya nya RM600 ungkup ruang bilik enggau orang tuai ti nadai laki tauka bini sereta RM300 ngagai raban bujang dara kena 19 Februari apin lama enggau 12 Ogos ti deka datai nengah chara dipasuk ke akaun bank tauka diberi mata duit ba pampang Bank Simpanan Nasional (BSN) serata menua,” ku iya.
Iya madahka sepenyampau RM210 juta udah diberi ngagai 700,000 penerima SARA serata menua, ku iya ensanus.
“Perintah terus komited enggau seruran matau gaya ke nyadi nyengkaum nyema subsidi besaran dipejalai sereta dipenyadi dalam nentuka bantu mata duit ari perintah terus diberi ngagai raban ti tusah dalam betapi pemar ungkus idup,” ku iya. — Bernama