Gaji mit kebuah graduet enggai gawa dalam sektor pengelandik: MITI
Gaji mit kebuah suntuk raban pengereja pengawa lokal kelebih agi ari sida ti udah tembu ba pelajar tinggi, taja pan peminta ari industri terus nambah, ku Opis Menteri Meranak Puku, Dagang enggau Industri (MITI),
Sapit Menteri MITI, Liew Chin Tong madah bepelasarka ripot statistik suku taun ti dikeluarka Biro Statistik Buruh Malaysia (MBLS), Opis Statistik Malaysia (DOSM) bisi 49,500 pengawa puang bepengelandik tinggi dalam sektor pengawa ngeluar ba suku kedua 2023.
Nambah nya ku iya, data suku ketiga 2023 ari Institut Maklumat dan Analisis Pasaran Buruh (ILMIA) ngeripotka bisi 22,248 mayuh bengkah pengawa puang ungkup industri profesional, saintifik enggau teknikal, ti mungkur 5,734 kompeni menua tu.
“Enti bepelasarka data tu, pemayuh graduet di Malaysia dianggap chukup kena nangkup peminta guna ari industri.
“Tang, tebal agi ari sida nya milih gawa di luar menua ketegal gaji ke diberi enggau alai gawa manah agi tauka ngambi bagi dalam ekonomi gig,” ku iya masa sesi tanya saut di Dewan Negara kemari.
Iya nerangka pekara nya lebuh nyaut tanya ari Senator
Datuk Mustafa Musa pasal pelaba pemayuh raban pengereja pengawa teknikal injiniring, sains enggau teknologi ti diguna pemeranak puku ba taun 2024 berindik ari bisi penerang iya nya perintah ngena raban pengereja pengawa ari luar ti lalu meri empas defisit ngagai peluang gawa ke raban graduet menua tu.
Liew madah bepelasarka pansik betajuk ‘Shifting Tides: Charting Career Progression of Malaysia’s Skilled Talents’ ari Institut Penyelidikan Khazanah apin lama ngeripotka penyampau
graduet baru ke bisi lebih pemandai enggau pengelandik terus nambah sereta betapi penanggul gaji mit, iya nya 65.6 peratus graduet ba taun 2021 nerima gaji baru berengkah gawa kurang ari RM2,000.
Ngenang silik, iya madahka MITI enggau Opis Menteri Pelajar Tinggi (KPT) begulai enggau opis menteri ti bukai bejalaika chara komprehensif kena nentuka graduet ti nadai kereja bulih gawa dalam industri sereta setipak enggau guna pemeranak puku, sereta napi peminta guna makit.
“MITI enggau KPT begulai enggau opis menteri (ti bukai) benung ngatur program ‘workbased learning’ kena ngenipak, awakka kitai ulih mai TVET (Pendidikan dan Latihan Teknikal dan Vokasional) setipak enggau industri begulai enggau program bukai ti ulih nempa graduet sereta profesional begulai enggau pekereja teknikal ulih setipak enggau peminta industri,” ku iya.
Taja pia ku iya, sida industri mega patut nyikap diri sereta ulih mayar gaji ti tinggi agi ngagai raban graduet menua