PETRONAS mayuh nyaup Sarawak nyengkaum ngaduka baru sekula balat jai di menua pesisir
Petroliam Nasional Berhad (PETRONAS) bakih strategik ti mayuh nyaup perintah Sarawak dalam pemansang modal mensia ti ukai semina melanja sekulaship tang mega mantu ngaduka baru sekula ti balat jai di menua pesisir Sarawak.
Menteri Industri Pemakai, Komoditi enggau Pemansang Wilayah, Dato Sri Dr Stephen Rundi Utom madahka, PETRONAS ulih meretika pengawa manah nya, iya nya meri enggau mantu ke bisi pengurang, ti ukai semina sekali tang tiap taun.
“PETRONAS iya nya bakih manah ti sanggup ngelawa menua pesisir baka ngagai menua ti jauh Binyo (Pelilih Menua Sebauh), Ulu Roban (Saratok) laban deka mantu ngaduka baru sekula dia, kitai chukup beterima kasih,” ku Kaban Kunsil Nengeri (ADUN) Kemena nya.
Iya madahka pekara nya ba Program Memacu Kehidupan Hari Raya Aidilfitri nyerumba pengawa bebuka puasa enggau nyuaka pemeri ti diatur anak syarikat PETRONAS, Malaysia LNG Sdn Bhd (MLNG) di Dewan Pavilion Kelab Kidurong Bintulu lemai Hari Tiga.
Ku iya, dalam timpuh ti sama perintah mega tetap bejalaika tanggung pengawa baka ngungkupka belanja sepenyampau RM1 bilion dikena bejalaika pekara ti sama iya nya kena ngaduka baru sekula ti balat jai di Sarawak.
Iya madahka, tanggung pengawa ke dipejalaika nya dikena mantu nembiak menua pesisir ti selalu ngasaika pengurang, ti enda ulih dijangka kitai deka tulihka penyulut jemah ila.
Ketegal nya ku iya, kitai patut seruran bebendar sereta patut sedarka pemesai guna pelajar ti ulih ngubah nasib individu.
Kena ngamatka nya ku iya, perintah Sarawak udah ngelanggur nyendiaka pelajar tinggi enda bebayar ungkup anak Sarawak ti nampung pelajar ba universiti Sarawak tauka palan pelajar tinggi Sarawak berengkah ba taun 2026.
“Nambah nya PETRONAS, Yayasan Sarawak enggau Yayasan Tunku Abdul Rahman mega sama mantu nembiak seranta,” terang iya.
Dr. Rundi madahka, sida iya ngasaika bisi pematut ngubah chara landskap di menua pesisir ambika banding dalam bidang betanam betupi.
“Kitai patut ngubah orang betanam betupi B40 ngambika ngena teknologi baru ngambika ulih kereja enggau lantang sereta efisyen ngulihka asil. Enti orang bukai ulih, kitai pan sama ulih,” ku iya.
Nitihka iya, diatu kitai ulih ngasilka 35 peratus padi ungkup beras, laluh iya 65 peratus diimport ari Vietnam, Pakistan enggau India.
“Nyema bisi penanggul, enti menua nya enda ulih nyual beras ke menua kitai, kitai deka makai nama? Kelia kitai ulih makai mulung enggau ubi tang diatu begunaka penentu penyukup pemakai,” ku iya.
Ku iya, patut nemu pemayuh peranak di sekeda menua ambika banding Taiwan sebuah menua mit sereta bisi tanah ti bisi had tang sida ngena teknologi ngemansangka pengawa betanam betupi.
“Sida ulih nanam padi atas perabung rumah di kandang endur mit ti dikumbai sida penentu penyukup pemakai.
“Kitai bisi tanah ke chukup besai tang kitai enda nemu ngena teknologi. Ia begunaka kitai belajar ngambika ulih ngemeranka nya,” ku iya.
Sama bisi datai Kaban Kunsil Nengeri (ADUN) Tanjong Batu Johnny Pang, ADUN Jepak Iskandar Turkee, Manijar Pengatur ti mega Tuai Pemesai Eksekutif Kumpulan Syarikat MLNG Mohamed Syazwan Abdullah @ Laga Jenggi, tuai opis perintah sereta tuai komuniti.