Penembu LAK ngaduka baru Loji Penapis Ai Batu Kitang ulih nyendiaka ai beresi 884 MLD
KUCHING: Lembaga Air Kuching (LAK) benung ngaduka baru siti ari loji sida iya di Batu Kitang kena nambahka kapasiti tauka pemayuh ai beresi ti dikeluarka ngagai 884 juta liter sehari (MLD).
Menteri Utiliti enggau Telekomunikasyen, Dato Sri Julaihi Narawi madahka kapasiti Loji Penapis Ai Batu Kitang ke diatu iya nya 780 MLD dikena napi peminta guna sepenyampau 730 MLD.
“Loji ti diaduka baru diatu iya nya deka nambahka kapasiti 104 MLD lalu nya nyadika penyampau semua kapasiti 884 MLD.
“Kitai ngarapka enggau penambah asil ai ari loji ti benung diaduka baru tu, kitai ulih nyendiaka ai ti diguna ungkup kandang endur di mengeri Kuching, Petra Jaya, Santubong, Rambungan, Sampadi enggau Demak Laut.
“Tu entara kandang endur ti bulih penguntung ari pengawa ngaduka baru loji di Batu Kitang tu,” ku iya madah ngagai pengarang berita maya ngabas Loji Penapis Ai Batu Kitang ditu, kemari.
Bejaku baru, kelimpah ari nyendiaka ai ngagai kandang endur nya, loji nya mega ulih nangkup peminta guna ari Opis Nyendiaka Ai Menua Pesisir (JBALB) ti disediaka ngagai kandang bagi menua Samarahan nyentuk ke Sadong Jaya, Asajaya, Sebuyau, Sebangan enggau sekeda endur di Simunjan.
Nya alai ku iya, Loji Penapis Ai Batu Kitang amat beguna laban JBLAB mega bepanggai ngagai loji nya kena nyendiaka ai ke bagi menua Samarahan.
Ku Julaihi, ungkus kereja ngaduka baru loji nya sepenyampau RM107 juta endang dipelanja perintah Sarawak sereta dipelaba semua kereja ngaduka baru nya tembu ba bulan Julai taun tu.
Kelimpah ari nambahka kapasiti ai ngagai 884 MLD, kereja ngaduka baru nya mega deka nambahka margin rizab Loji Penapai Ai Batu Kitang ngagai 12 peratus dibandingka enggau lima peratus.
“Pengawa tu deka terus dipejalaika perintah Sarawak kena nambahka ai beresi ba kandang endur ke dipadahka nya.
“Diatu kontraktor agi bejalaika ujian enggau operasyen dikearapka ba bulan Julai ila, kapasiti loji tu deka nambah ngagai 884 MLD enggau margin rizab 12 peratus,” ku iya.