Putarka dulu isu nembiak lubah belajar sebedau numbuhka AI dalam kurikulum: Sagah
KUCHING: Kemeratka dulu penanggul nembiak lubah belajar sebedau numbuhka pemintar artifisyel (AI) dalam kurikulum sekula primari, ku Menteri Pelajar, Inovasyen enggau Pemansang Penau Dato Sri Roland Sagah Wee Inn.
Kena 26 Mac, Menteri Pelajar Fadhlina Sidek dalam saut betulis di Parlimen madahka, nembiak sekula primari deka diajar asas AI di sekula berengkah taun 2027.
Fadhlina madah dalam beberapa taun agi, kurikulum sekula deka ngemasukka literasi digital dalam kurikulum nyadi siti ari tujuh kompentensi ti mesti dikuasa nembiak sekula.
Lebuh ditanya bekaul enggau isu nya, Sagah enggau bebendar madah enti deka bejalaika AI ke dalam kurikulum, isu baka nembiak dalam raban lubah belajar patut diputarka dulu.
“Sida tu (nembiak raban lubah belajar) enda ulih nyapai standard sekeda pekara dalam macha, nulis enggau matematik.
“Udah tentu, enti bisi disediaka belanja, kitai ulih ngatur mayuh pekara kena bejalaika AI, tang kitai anang enda ingat kitai mesti mutarka sida ti mayuh bedau nemu macha enggau nulis, sereta penyampau iya chukup meri pengirau,” ku Sagah.
Iya madahka pekara nya
lebuh dirandau pengarang berita pengudah bejadi pengerami majalah Synthesis Sarawak ditu, Hari Tiga.
Ngenangpasalchelakketerubah majalah Synthesis Sarawak, iya madahka, pengawa nyelak nya ngayanka komitmen opis menteri ti nadai midaka pengawa ngenegapka raban bansa di Sarawak, kelebih agi ba raban nembiak.
“Majalah Synthesis chelak keterubah ngayanka gambar ti manah pasal pemansang sains dan teknologi ti nyadi di Sarawak.
“Penyulut tu dijapai nengah kerejasama entara perintah kitai, GLC kitai, enggau institusyen akademik kitai. Penegap runding penyerakup nya nyadi penyungkak ngagai inovasyen ti nadai betatak.
“Majalah Synthesis Sarawak nyadi inspirasi tauka peransang,
meransang rebak dudi ngambika anang takut nyulut dalam Sains, Teknologi, Injiniring, enggau Matematik (STEM). Bidang tu deka meri pemanah jemah ila enggau ngerandang penumbuh Sarawak,” ku iya.
Majalah Synthesis Sarawak deka ngayanka artikel pasal pengawa pemansik ti dipejalaika di nengeri tu, ditulis ngena chara ti senang dipereti.
Majalah nya deka disadung ke sekula, universiti enggau librari mensia mayuh di serata Sarawak nyengkaum mayuh bengkah bidang baka bioteknologi, kuasa beresi enggau kereban pemadu maju.
Nyempulang Sagah iya nya dua sapit menteri iya, Datuk Dr Annuar Rapa’ee enggau Datuk Francis Harden Hollis, sereta Sekretari Mendam Opis Menteri, Datu Azmi Bujang.