Pengawa nganti arus paip lama serata Sarawak berengkah taun tu
Pengawa nukar arus paip lama sepemanjai 2,740 kilometer di serata Sarawak deka berengkah dipejalaika taun tu, ku Menteri Utiliti enggau Telekomunikasyen, Dato Sri Julaihi Narawi.
Nitihka Julaihi, ungkup taun tu aja sepenyampau RM247 juta dikemendar kena nganti nya sereta dipelanja perintah Sarawak.
“Kitai deka nentuka dini alai ti mayuh paip lama sereta jai ke patut diganti awakka kitai ulih nyendiaka ai enggau meruan.
“Tu langgur timpuh panjai laban kitai (perintah Sarawak) udah ngemendarka pengawa nganti paip tu dalam timpuh lima taun ngena ungkus belanja RM1 bilion,” ku iya.
Iya madahka pekara nya ngagai raban pengarang berita maya ngabas pemansang kereja ngaduka baru Loji Penapis Ai Batu Kitang ditu kena nambahka kapasiti ai beresi ke dikeluarka ngagai 884 juta sehari (MLD) ari 780 MLD.
Kelimpah ari nganti arus paip lama, ku Julaihi, perintah Sarawak diatu benung chakah ngemansangka Sistem Grid Ar Nengeri ti dipejalaika berenggat di serata Sarawak.
Ambika chunto di Tanjung Manis ku iya, perintah udah bejadi Loji Penapis Ai Tanjung Manis kena 17 Mac apin lama ti dipenyadi Premier Sarawak, ti ulih nyendiaka ai ke kandang menua ngelingi Belawai.
Loji di Tanjung Manis ku iya, ulih nyendiaka 30 MLD tang peminta ditau semina 13 MLD.
“Paip ari Tanjung Manis deka besambung enggau paip
ti disediaka Lembaga Air Sibu enggau ngaga grid.
“Lalu sama mega ba kandang endur bukai ambika banding di Serian, kitai bisi Loji Penapis Ai Slabi enggau Projek Fasa 2 Nyendiaka Ai Wilayah Serian ti deka besambung ngaga grid,” terang iya.
Semua projek nya ku Julaihi, nya pengawa ti nadai ngetu dipejalaika perintah Sarawak kena nyapai akses
nyendiaka ai lebuh manggai 2030.
Diatu ku iya, akses nyendiaka ai di kandang menua pesisir iya nya 70 peratus enggau di serata Sarawak (mengeri enggau menua pesisir) entara
84 peratus enggau 85 peratus.
“Mayuh projek udah dikemendarka perintah Sarawak ti benung dipejalaika sereta semua nya dipelanja perintah Sarawak,” ku iya.