PADU enda patut ngumpul penerang diri rayat kelalu silik
Patut bisi tatak ari baruh Akta Perlindungan Data Peribadi kena nyaga penerang diri rayat, setipak pekara ti ditetap dalam konstitusyen ari sukut hak
KUCHING: Enda patut amat Pangkalan Data Utama (PADU) ngumpul penerang diri kelalu silik ari rayat ti ngujungka nyadi tanda tanya enggau meri pengirau ngagai semua orang.
Premier Sarawak Datuk Patinggi Tan Sri Abang Johari Tun Openg madahka, patut bisi tatak ari baruh Akta Perlindungan Data Peribadi kena nyaga penerang diri rayat, setipak enggau pekara ditetap dalam konstitusyen tauka perlembagaan ari sukut hak.
“Kita bisi hak enda mantaika penerang diri kita empu.
“Tang nyema ia bekaul enggau penatai pemisi enggau mega gaya ekonomi, udah tentu data nya bekaul tauka relevan agi,” ku iya.
Iya meri penerang nya lebuh dirandau raban penga
Premier Sarawak
rang berita pengudah ngulu pengerami ngintu Nuzul Al-Quran Renggat Nengeri Sarawak Taun 1445H/2024M di Masjid Al-Muttaqin Kota Samarahan, malam ensanus.
Abang Johari taja pia, madahka perintah nengeri tetap nyukung objektif manah PADU baka tuju ia ti kena bejalaika subsidi beselinting tauka diberi ngagai penerima ke patut enggau awakka perintah meri kebuah subsidi nya sereta kena nyeliahka potensyel pantis dalam pengawa ngagihka subsidi.
“Sida ti dalam kategori nya mesti dibantu. Taja pia penerang ti diguna tauka dipinta (PADU) kelalu silik nyentuk ngasuh orang irau,” ku iya.
Berebak enggau tu, Abang Johari madahka diri bedau bulih penerang silik pasal asil randau entara Opis Menteri Ekonomi enggau pengari perintah Sarawak ti berandauka isu PADU.
“Nitihka maya sida ari Opis Menteri Ekonomi ke deka datai (kitu) laban udah tentu Menteri Ekonomi Rafizi Ramli deka nemu nama kebuah Sarawak minta PADU ditangguh.
“Kitai mega bulih penerang ti bukai (pasal sistem PADU tu) kelebih agi bekaul enggau penerang diri tauka privasi,” ku iya.
Baka ti udah dipadah, Sekretari Perintah Sarawak Dato Sri Mohamad Abu Bakar Marzuki udah ngenukuka iya nya sida Opis Menteri Ekonomi deka datai ke Sarawak minggu baru lalu berandauka pekara nya.
Media sebedau tu ngeripotka, Sarawak minta sekeda ubah diaduka baru bekaul enggau penerang diri ti dipinta diisi dalam sistem PADU ketegal bisi pengirau bekaul enggau penerang diri individu ti patut iya tau enda ibuh dibantaika.
Kelimpah ari nya, isu pasal data diambi enggau pantis ti ngerembai diatu mega meri pengirau besai ngagai perintah Sarawak nyentuk minta pengawa ngisi PADU ditangguh.
“Tang nyema ia bekaul enggau penatai pemisi enggau mega gaya ekonomi, udah tentu data nya bekaul tauka ” relevan agi. Datuk Patinggi Tan Sri Abang Johari Tun Openg