Pemansang pengelandik nembiak ba institusyen JKM patut diangkatka: Nancy
KUCHING: Pemansang pengelandik enggau potensial nembiak mit ari baruh intitusyen ke diatur Opis Pengintu Pengelantang Pendiau Komuniti (JKM) patut diintu enggau meruan.
Menteri Pemansang Orang Indu, Ruang Bilik enggau Komuniti (KPWKM) Dato Sri Nancy Shukri madah, pengawa ti pemadu beguna tu nentuka nembiak mit ulih ngatika diri enggau pengelandik ke bisi ba sida jemah ila.
“LEbuh kitai bejaku bekaul enggau ekonomi tauka ngangkatka tikas pengidup, kitai patut mantu nembiak mit tu enggau neresa sereta ngansah pengelandik sida ngambika nyadi orang ti ukai semina nyadi penerima aja tang ulih nyukung ngagai pemujur jemah ila.
“Nyema udah bisi pengelandik enggau pemandai diri empu, nya mih nentuka sida ulih ngatika diri lalu ngembuan pengawa ti bepelasarka nama ti dikerindu sida,” ku iya lebuh ti ditemu pengarang berita pengudah bejadika Program Tautan Kasih Ramadan Rumah Kanak-Kanak Toh Puan Hajah Norkiah di Batu 12 ditu, kemari.
Nancy madah, KPWKM kebendar nya udah bisi nyendiaka program pemansang pengelandik baka ngatur pekit ngagai nembiak di institusyen JKM.
“Taja pia, tu ngetu enda lama nyangka ketegal pandemik COVID-19 lalu ari tu, aku
beratika kitai patut nampung baru program pemansang pengelandik baka tu.
“Laban tu iya nya peluang ngagai sida ngaul enggau meda diri empu bakani sida ulih besemekih di luar enggau ngayanka pengelandik ke bisi ba sida,” ku iya.
Dulu ari tu, Nancy dalam jaku pengelalu iya madahka KPWKM endang siru enggau guna raban ti nyadi tagit kelebih agi sida nembiak mit enggau orang lunggar umur ti nerima servis nyaga enggau ngintu ba intitusyen JKM.
Nitih ku iya, mayuh macham program patut diatur lalu dipejalaika dikena nentuka sida ke diau ditu ngerapitka kaul lalu ngasaika hak sida nyadi orang ti patut bulih penyiru enggau penyayau setipak enggau Polisi Nembiak Mit Menua, Akta Nembiak
Mit 2001 enggau Polisi Raban Lunggar Umur Menua.
“Nya alai, kaul kolaboratif strategik semua raban dalam ngerichahka program sehari tu (kemari) iya nya mantaika ngagai KPWKM kitai semua ngembuan juluk ti sama dalam mekuh ngagai pemerat nembiak mit enggau orang lunggar umur di menua kitai,” ku iya.
Bekaul Program Tautan Kasih Ramadan, ku Nancy madah, tu ngembuan empat objektif besai iya nya ngerapitka keul enggau kerejasama entara raban orang ti gawa sereta sida ke diau di rumah tu, kelimpah ngerapitka kaul nengah penyereta begulai dalam program.
Kelimpah ari tu, ku iya, tu dikena ngerichahka bulan Ramadan enggau aktiviti ti besai reti enggau pengawa
beberi lalu meransang integrasi entara dua rebak iya nya nembiak mit enggau orang lunggar umur.
Beserimbai enggau tu, iya ngarapka mayuh agi kaban strategiknyukunglalubejalaika program di institusyen ti diatur JKM Sarawak jemah ila.
“Pemeri tauka bantu ti nadai taka ngagai pekara belanja aja. Nyema kitai ulih ngelimpangka jam enggau energi, pengelandik, sukung nengah chara mental tauka runding ulih meri pengerindang ngagai bala anak sereta sida ke diau di institusyen tu,” ku iya.
Ba pengerami tu Nanacy mega nyuaka 136 pemeri Hari Raya, bubur lambuk enggau bubur pedas ngagai raban ke diau di Rumah Kanak-Kanak Toh Puan Norkiah sereta sida ti diau di Rumah Seri Kenangan Kuching.