M-FICORD ngelaluka raban ti deka nanam pun kayu RT-Paulownia ti jampat tumbuh, potensial besai
Opis Menteri Industri Pemakai, Komoditi enggau Pemansang Wilayah (M-FICORD) ngelaluka inisiatif nanam pun kayu RT-Paulownia ke endang bisi potensial ukai semina dalam pengawa ngaga perabit tang mega nentuka pemeruan rampa menua.
Menteri M-FICORD Dato Sri Dr Stephen Rundi Utom madahka, pun tu ukai semina jampat tumbuh tang daun pun tu mega jampat nyerap karbon dioksida.
“Sehari tu (Kemari) aku ngelawa ke ladang TSG tu dikena meda bakani proses nanam pun kayu Paulownia tu.
“Tu iya nya siti potensial ti besai dikemansang laban ti jampat tumbuh iya nya dalam tiga taun udah ulih ditebang lalu ulih dikena ungkup perabot enggau ke bukai.
“Taja pia, tu mega kitai meda potensial ba pekara nginsap karbon,” ku iya lebuh ditanya pengarang berita.
DUlu ari tu, iya udah ngelawa ke Palan PEmansik enggau Pemansang (R&D) enggau Palan Nyemai TSG di Kota Samarahan sebedau ngelawa ke makmal nanam RT-Paulownia ke diekmansangka TSG Green Sdn Bhd ba TSG Tower, Brighton Square ditu.
Nitih ku Dr Rundi, iya dipadahka kompeni TSG Green ngembuan sebuah kandang endur pemesai 10,000 hektar di Kanowit ungkup pengawa nanam pun kayu tu.
“AKu ngarapka sida endang ngembuan pengerindu dalam nemu enggau silik bekaul penatai pun kayu tu lalu belajar diri empu baka chara ke patut.
“Sida disediaka enggau penemu betanam betupi tu ke alai sida nyangka ulih nanam kediri empu,” ku iya.
Lebuh ti ditanya bekaul enggau pengawa komersial nanam pun kayu tu, iya madahka berindik ari pun tu ti agi baru ba kampung ditanam ba nengeri tu, tu agi patut diatur baru dalam mayuh pekara.
“Potensial endang udah bisi ditu tang bejaku bekaul enggau komersial tu udah tentu ngaul pekara untung rugi, ke alai kitai patut besedia ari sukut risiko beranakka puku.
“Nyangka agi mayuh ke bedau besedia dalam beranakka puku sida dalam pengawa nanam tu. Tang ungkup perintah kitai udah bebendar mantu sida ti ngembuan pengerindu,” ku iya.
Bekaul enggau makmal tu iya madah pengawa mansik enggau pemansang (R&D) ke sama ulih digaga ungkup utai tanam ti tinggi rega ke udah ditemu opis menteri ungkup industri tu.
“Ari makmal ditu, kami ulih belajar ngaga R&D ti sama ngagai utai tanam ti tinggi rega ngambika ditemu ungkup industri.
“Kitai ulih ngaga tu ngagai pisang, rungan, nanas enggau ke bukai. Ngambika kitai ulih nentuka tu meruan lalu kitai ulih ngerembai nyadi industri pemakai.
“Aku beterima kasih ngagai ketuai pemesai eksekutif raban TSG Dato Chris Chung ba inisiatif iya, aku pechaya orang bukai ulih belajar ari iya,” ku iya.
Sama datai Sapit Menteri iya Datuk Malcolm Mussen Lamoh enggau Ketuai Pemesai Eksekutif Kumpulan TSG Green Dato Chris Chung.