Seni main asal Iban Kuntau patut terus dipelajarka raban nembiak
Seni ngeringka diri raban bansa Iban ya nya Kuntau patut terus dipelajar dikena nentuka terus dipeturunka ngagai raban nembiak rebak baru, ku Guro Kuntau Kipas Dam Dam Spring Tuai Rumah Degom Usit.
Nitih ku iya, kuntau tu iya nya seni belaban ti ngembuan mayuh bunga lalu majak dikerindu rebak nembiak diatu.
“Taja dulu kelia tu kurang ditemu laban dipelajar ba kampung lalu jauh ari palan pengentap pendiau tang diatu tu diajar ba kandang mengeri lalu nyamai diakses sapa aja ke ngembuan pengerindu deka nguasa seni belaban tu,” ku iya.
Iya madah munyi tu lebuh ti bejaku maya bejadi pengawa Tembu Kuntau Kipas Dam Dam Spring ti diatur Gerempung Seni Kuntau Kipas Dam Dam Spring Bintulu kena Hari Minggu tu tadi.
Ku iya, setipak enggau ubah jeman diatu, kuntau kemaya hari tu iya nya seni enggau main asal ti ditegika dalam komuniti Dayak diatu diajar ba kandang mengeri baka Bintulu.
“Diatu tu diangkatka mayuh raban rebak nembiak, kelebih agi komuniti Dayak kemaya hari tu, nemu bekaul enggau seni ti dipeturunka ari aki ini sida empu,” ku iya meri penerang.
Degom madah, dulu kelia raban orang lelaki ti dikemendar belajar kuntau tang diatu raban orang indu mega bisi ti belajarka kuntau.
Nama ti pemadu beguna diatu, ku iya, seni belaban kuntau tu iya nya seni enggau main asal ti lama udah bisi lalu patut dipelajarka ninting maya.
“Nama ti dikearapka aku ti nyadi pengajar kuntau ngambika seni belaban tu terus ditemu lalu dikerembai ngagai sapa aja ke deka belajar baka seni belaban ke bukai,” ku iya.
Nyadika penemu, Degom udah ngajar Kuntau Kipas Dam Dam kenyau ari taun 1989 ke alai dalam taun 2021 Gerempung Seni Kuntau Kipas Dam Dam Spring udah direjista ba Opis Pengerejista Gerempung Malaysia (ROS).
Nyadika rikod, kenyau tiga taun ti udah gerempung tu bisi 736 iku kaban.