Projek infrastruktur pelajar, pengerai di Sarawak deka berengkah ujung taun tu
Tu ngena semua agih belanja perintah nengeri Sarawak ti mekuh dalam sektor pemadu beguna iya nya perubat, nyaga pengerai enggau pelajar: Abang Johari
Kitai udah bisi siti mekanisma, semina bayar ganti ari perintah besai. Sereta kitai bisi komiti ari renggat pegawai ti ngatur pekara tu. Asai aku ujung taun tu kitai deka berengkah.
Datuk Patinggi Tan Sri Abang Johari Tun Openg
KUCHING: Projek infrastruktur pelajar enggau pengerai ti digaga ngena duit perintah Sarawak deka berengkah ujung taun tu.
Premier Sarawak, Datuk Patinggi Tan Sri Abang Johari Tun Openg madahka, perintah nengeri benung chakah ngelangkar kerejasama enggau perintah besai dalam sektor pemadu beguna iya nya bekaul enggau perubat, nyaga pengerai enggau pelajar.
Pekara bekaul enggau pelajar sereta pengerai kediatu agi dibaruh kuasa perintah besai.
“Kitai udah bisi siti mekanisma, semina bayar ganti ari perintah besai. Sereta kitai bisi komiti ari renggat pegawai ti ngatur pekara tu. Asai aku ujung taun tu kitai deka berengkah.
“Kemari (ensanus) aku bisi berandau enda formal enggau Sapit Menteri Pengerai Dato Lukanisman Awang Sauni. Sida diatu udah bisi komiti ti ngelangkar mekanisma dikena kitai ngaduka baru klinik.
“Enti nyema tangga nya balat jai, lantai enda digaga, ku aku madah nya patut diruntuh sereta digaga baru. Ungkupbelanjakenangaduka baru nya ari kitai dulu, udah nya sida perintah besar mayar pulai (ngagai kitai),” ku iya ti nyadi Menteri Pekara Wang enggau Ekonomi Baru.
Abang Johari dirandau raban pengarang berita pekara nya nyerumba iya datai ngabang Hari Raya Aidilfitri ngagai rumah Penyanding Penemu Opis Menteri Dagang Antarabansa, Industri enggau Meranakka Puku, Dato Sri Mohd Naroden Majais ditu, kemari.
Kelimpah ari nya, ditanya bekaul enggau menua Singapura deka bisi Menteri
Besai ti baru sereta impak ngagai kaul dagang entara dua menua, Abang Johari madahka Sarawak endang nempa kerejasama rat dalam kaul dagang enggau menua Singapura.
Iya madahka Lawrence Wong ti deka dichiri nyadi Menteri Besai Singapura baru kena 15 Mei tu iya nya siku orang ti ngembuan penemu jauh enggau manah pasal kerejasma sereta pemereti ati entara Singapura enggau Malaysia, kelebih agi Singapura enggau Sarawak.
Iya pechaya pengawa betukar nya deka bejalai enggau lanchar tauka nadai meri penanggul ngagai Sarawak laban nya perintah ti sama, pemesai ti sama semina komander ti
betukar.
“Ari Sarawak agi ketuai ti sama. Nya alai kami neruska nama ti udah dipejalaika begulai, kelebih agi dalam kerejasama energi enggau dagang kitai nengah STATOS, aku ngasaika nadai penanggul.
“Kitai ngelaluka tauka nyukung Lawrance (nyadi Menteri Besai baru Singapura) ti bisi peneleba ti manah, sereta iya baka ti ditemu kitai,
iya menteri pekara wang.
“Lalu iya udah madah ngagai aku iya nya maya kami berandau bakani sida mantu raban B40 ke diberi perintah Singapura. Aku berunding nya chara ti manah. Sida ngaga baucher laban bisi palan nyimpan pemakai nengah gerempung sida. Aku ngasaika enti kitai nyebut (bantu) besaran, chara Singapura iya nya model ti manah,” ku iya.