DBK Melikin, KDBK deka ngatur Kelas Ngajat Ke-14 ba Samarahan enggau Serian

Serakup Dayak Bukit Kelingkang (DBK) Pampang Melikin begulai enggau Kebudayaan Dayak Bumi Kenyalang (KDBK) deka ngatur Kelas Ngajat Renggat Ke-14 ba kandang Samarahan enggau Serian.

Pengajar Korea Musit ke mega Pengatur Pogram Kelas Ngajat Renggat Ke-14 madahka, tuju ngatur kelas nya berindik ari ti deka meda main asal terus didegika, tebilang, sereta ngerembai ti nyadi ke identiti bansa.

Nambah nya ku iya, kelas tu diatur ketega bisi sukung enggau timbal manah ari orang ti belajar ngajat ba renggat ke-7 ngagai ke-13 apin lama.

“Ba renggat ke-14 tu bisi Kelas Ngajat Asas Indu, Kelas Ngagat Pua Kumbu, enggau Kelas Ngajat Orang Ulu ti deka diatur.

“Kelimpah ari nya Kelas Ajat Asas Lelaki, enggau Terabai sama deka dibuka ba Balai Ringin Serian” ku iya.

Peranak menua tu ti besemak ba kandang endur kelas tu diatur sama diperansang enggau masuk kelas belajar ngajat ba renggat Ke-14 sereta tau ngerijista nama berengkah ari diatu, ti dipelaba deka diatur sepengudah diputuska pengatur kelas ila.

Nitihka Korea, kelas nya tebuka ngagai semua renggat umur, enda ngira lelaki tauka indu, mit tauka besai sereta dipejalaika ba kandang Samarahan, Balai Ringin.

“Barang sapa ti deka ngerejister, masuk kelas belajar ngajat tu tau betanya ngagai aku empu ba lumur 017-855 2885 (Korea Anak Musit)” ku iya.

Kelimpah ari penerang bekaul enggau kelas tu mega tau ditanya ngagai pengajar ngajat lelaki ba lumur 0128729355 (Reagen) enggau 0128099349 (Brain).

“Aku ngarapka kitai anang muai peluang ti bisi disediaka serakup tu, tu seraya kitai ngerembai sereta ngetanka main asal bansa kitai.

“Angkun sereta kemeranka adat enggau budaya bansa kitai ngambika terus tebilang jelai berita ke serata dunya,” ku Korea.