Fasiliti ba pintu penama KIA patut diaduka manah agi
Ngambika ulih nyadi entara pematak penatai temuai ari menua luar neresa pemanah rampa menua di nengeri tu
KUCHING: Pemanah fasiliti ba pintu penama menua baka padang bilun kelebih agi Padang Bilun Antarabansa Kuching (KIA) patut diaduka manah agi, ti ulih nyadi pematak penatai temuai ari luar ke nengeri tu.
Menteri Dagang Temuai, Industri Kreatif enggau Seni Pemerindang, Dato Sri Abdul Karim Rahman Hamzah madahka, baka ba padang bilun nengeri tu mayuh pekara tauka fasiliti sereta servis ke patut diaduka baru laban tebal agi endang enda nyapai tagit.
Iya madahka diri enda lantang ati enggau fasiliti enggau servis ti bisi disediaka ba padang bilun di nengeri tu, ti begunaka pengibuh tauka patut dikemeratka Malaysia Airports Holdings Berhad (MAHB) ti nguruska tebal agi padang bilun di
Malaysia.
“Enti nuan deka ngelakuka diri (ba pengawa dagang temuai), mayuh pekara beguna ti patut dikereja. Baka agu kitai, padang bilun kitai, laban ari penemu aku kediri, aku meda padang bilun kitai mayuh pekara ke patut
diaduka baru. Aku chukup enda lantang ati (meda gaya fasiliti enggau servis padang bilun kitai).
“Nya kebuah (kitai ngarapka) MAHB anang semina fokus di Padang Bilun Antarabansa Kuala Lumpur (KLIA), (laban KIA) di Kuching mega
padang bilun antarabansa , sama mega di Kota Kinabalu (KK).
“Laban kitai bisi temuai ari renggat antarabansa, enggau ari menua bukai datai ke Kuching. Nya semua pekara nya patut diperatika kita (MAHB) enti enda nya deka mai nama jai ngagai semua nengeri ti bisi padang bilun antarabansa, sekalika di Pulau Pinang, Senai, di KIA, tauka di KK,” ku iya.
Abdul Karim nyebut pekara nya dalam aum pengarang berita IMEX Frankfurt 2024 ti diatur ba Bilik Baum Opis Menteri Dagang Temuai, Industri Kreatif enggau Seni Pemerindang di Begunan
Baitulmakmur II ditu, kemari.
Iya ditanya bakani opis menteri iya, NGO sereta semua ejensi ti bekaul ngemanahka agi tauka nempa mayuh agi pematak dalam produk dagang temuai Sarawak.
“Enda ibuh ke bukai ba padang bilun di Kuching aja, aku enggai nyadi enda ngaku (fasiliti) endang enda nyapai tagit, sekalika ari segi agu, sekalika ari segi servis ke patut disediaka.
“Pekara bukai ke patut diperatika kitai pasal perengka guna. Enti kitai mayuh produk dagang temuai, sereta kami benung ngaga ia, kami deka ke Gua Niah nyadi siti agi taba pesaka UNESCO, ti dikearapka bulih bulan ke deka datai, ngarapka ba bulan Julai.
“Nya kebuah kami ngarapka perengka guna din (Gua Niah) meruan, laban kami melabaka bisi penambah ba pemayuh orang ke datai kia, sekalika ari luar enggau dalam menua, nya alai agu mesti bisi, endur diau disikap manah enggau ukai semina gua aja,” ku iya.
Nyempulang iya maya baum pengarang berita, Sapit Menteri Dagang Temuai, Industri Kreatif enggau Seni Pemerindang, Datuk Snowdan Lawan enggau sida ti bukai.
“Enti nuan deka ngelakuka diri (ba pengawa dagang temuai), mayuh pekara beguna ti patut dikereja. Baka agu kitai, padang bilun kitai, laban ari penemu aku kediri, aku meda padang bilun kitai mayuh pekara ke patut diaduka baru. Aku chukup enda lantang ati (meda gaya fasiliti enggau ” servis padang bilun kitai). Dato Sri Abdul Karim Rahman Hamzah Menteri Dagang Temuai, Industri Kreatif enggau Seni Pemerindang