Sarawak Pavilion deka ngangkatka nengeri tu ba IMEX Frankfurt di Jerman kena 14-16 Mei
KUCHING: Sarawak deka nyadika nengeri tu ulih dikelala dunya nengah Sarawak Pavilion ti ngambi bagi ba pengawa pemandang dagang IMEX Frankfurt di Jerman kena 14 ngagai 16 Mei ke deka datai.
Menteri Dagang Temuai, Industri Kreatif enggau Seni Pemerindang Sarawak, Dato Sri AbdulKarim Rahman Hamzah madahka, IMEX Frankfurt iya nya pengawa tauka pengerami antarabansa besai ungkup pengawa dagang, sereta 2024 iya nya taun ke-2 Sarawak Pavilion ngambi bagi, pengudah keterubah iya ba taun 2023.
Iya madahka nengah pengerami nya, Sarawak deka nguna manah potensyel sereta nanggam kaul enggau raban IMEX Frankfurt ngambika ulih chakah nempa peluang dagang enggau pengemeran antarabansa.
“Di IMEX Frankfurt deka meri peluang ti tegap kena matak aum korporat antarabansa enggau makit insentif nengah chara mandangka budaya, pengawa neresa kampung, pengeraja enggau pendiau asal, pemakai enggau pengerami kitai.
“Pavilion iya nya pemutus strategik dikena ngumpul penemu makit ti berega enggau terus nempa status kitai nyadi mudal pesaka ba pengawa dagang. Kitai deka dikelala ukai semina diatu, tang mega ba taun-taun ti deka datai,” ku iya.
Abdul Karima madahka pekara nya dalam aum pengarang berita IMEX Frankfurt 2024 ti diatur ba Bilik Baum Opis Menteri iya di Begunan Baitulmakmur II ditu, kemari.
Nitihka iya, ba pengawa pemandang dagang nya deka dipasuk begulai enggau Borneo Adventure; Borneo Convention Centre Kuching; Cat City Holidays; Hemisphere Hospitality; Place Borneo; Pullman Miri Waterfront Hotel enggau Pullman Kuching Hotel.
“Kami mega nempa kerejasama enggau orang dagang mikro, mit sereta jelan pemesai menua tu, sereta gerempung ukai dikuasa perintah (NGO) ba pengawa mandangka produk menua kitai ke ulih diasaika dunya enggau engka ulih meranakka puku jemah ila.
“Tu maya Sarawak diaku enggau dikelala nyadi penyemekih kebendar dalam makit global.
“Meri tabi puji enggau pengaga ati ngagai Business Events Sarawak laban ti udah bulih taun tu enggau IMEX Frankfurt. Ngarapka mujur ngagai semua orang dalam ngulihka peluang baru ungkup organisasyen diri empu. Tu peluang kita nunjukka iya nya Sarawak seruran besedia ba pengawa dagang,” ku iya ti mega Menteri Nembiak, Lumba enggau Main, sereta Pemansang Orang Dagang.
Ku iya, jurai tauka topik besai di IMEX taun tu iya nya ‘impak’ ti enggau misyen ngumpul komuniti pengerami dagang dunya kena bejalaika pengawa dagang enggau pasal isu ti mar ditapi mensia enggau planet tu.
“Sarawak bekunsi misyen ti sama, nya alai Sarawak Pavilion ngena rambai jaku ‘Pengawa Dagang Nyukung Pemansang Komuniti’, dikena ngerami pekara dikemeratka inudtri dalam nyadi pengepun ubah rama enggau ekonomi nengah pengawa dagang.
“IMEX Frankfurt iya nya pengawa pemandang dagang ti chukup manah kena ngelakuka Sarawak nyadi palan pengawa dagang enggau nyadika kitai dikelala dunya. IMEX endang chukup setipak kena ngelanggur pengawa dagang ti ngemeratka pengawa mutarka isu rampa menua, rama enggau tadbir urus; Strategi Pemansang Pengudah COVID-19 Sarawak (PCDS) 2030 ti ulih nyaup misyen sida. Nya alai, PCDS 2030 deka nyadi siti ari tiga pekara beguna,” ku iya.
Pekara ke-2 ti deka dipejurai bekaul enggau impak pesaka, laban Sarawak dianggap nyadi siti palan pemadu mujur di dunya pasal pesaka pengawa dagang, ku iya.
Dikena neruska pengawa nempa status nyadi Mudal Pesaka Pengawa Dagang di Malaysia enggau Borneo, ku iya, pengawa pemandang mit pasal impak pesaka deka diatur begulai enggau pengawa bejadi Volume 2 Issue 2 of the International Journal of Business Event and Legacies.
“Jurai tauka topik ke3 enggau pemadu narit ati, deka diulula Culinary Heritage and Arts Society, UNESCO Creative Cities Network Kuching, penyedia F&B, The Bibber’s Tale.
“Taun tu kitai mandangka kaul manah antara pengawa dagang enggau komuniti pemakai enggau ai irup ti kreatif,” ku iya ti disempulang Sapit Menteri Dagang Temuai, Industri Kreatif, enggau Seni Pemerindang, Datuk Snowdan Lawan, CEO Business Events Sarawak, Amelia Roziman sereta sida ti bukai.