Projek ngaga baru Jalai Ulu Sungai Merah beungkus RM25.58 juta
Projek ngaduka baru Jalai Ulu Sungai Merah ti ngena belanja sepenyampau RM25.58 juta berengkah dipejalaika kemari sereta dipelaba tembu dalam timpuh 24 bulan.
Pekara nya dipadahka Sapit Menteri Pelajar, Inovasyen, enggau Pemansang Penau, Datuk Dr. Annuar Rapaee sereta Sapit Menteri Pengerai Mensia Mayuh, Pengawa Berumah, enggau Perintah Lokal,Datuk Michael Tiang dalam aum pengarang berita begulai ensanus.
Nitihku seduai iya, projek nya nyengkaum pengawa nangkir jalai urung penyauh 2.14 kilometer ari siti jalai/ arung(laluan), ngagai dua jalai/arung(laluan).
Jalai/Arung(Laluan) nya ari simpang lampi trafik di Jalan Ling Kai Cheng nyentuk ke Lorong Ulu Sungai Merah 48.
“Projek tu deka ngurangka penyekut jalai ba kandang endur nya ti bisi urung 3,000 ruang bilik sereta dua sekula, iya nya SMK Sungai Merah enggau SJKC Nang Sang sereta sebuah gerija,” ku seduai iya.
Nambah nya, seduai iya mega meri sadang penemu ngagai Opis Tanah enggau Survei (JTS) ngambi ulih berundingka pengawa ngaga jejantas tauka jematan meraka jalai, dikena nyaga pengelikun nembiak sekula.
Tu laban, seduai iya irauka pengelayang zebra (lintasan zebra/zebra crossing) enggau lampu trafik engka ulih ngujungka penyekut kerita ba jalai nya laban bisi dua buah sekula ba kandang endur nya.
“Dikena nyaga pengelikun nembiak sekula, kami dua udag meri sadang penemu ngagai JTS Sibu ngambika ulih berundingka ngaga jematan meraka jalai dibandingka enggau pengelayang zebra(lintasan zebra/zebra crossing) enggau lampu trafik ari baruh projek tu.
“Kitai irauka bisi nembiak enda nemu nengah jalai tauka pengelayang zebra enggau betul nyentuk ngeruga pengelikun diri empu enti sida belanda ngelayang jalai nya.
“Berindik ari nya, kami ngasaika lebih likun agi bisi jejantas tauka jematan meraka jalai (ari seberai jalai) nungka SMK Sungai Merah ke laman tauka kompaun sekula,” ku seduai iya.
Seduai iya nerangka ungkus ngaduka baru jalai nya enda nyengkaum pengawa mindah tauka ngaduka baru utiliti ti dianggar manggai RM8.5 juta.
Nya alai, seduai ngarapka projek nya meri empas positif ngagai peranak ba kandang endur nya kena ngangkatka pengelikun ba jalai nya sereta ngaduka baru aksesibiliti ke sekula enggau kandang endur diau.