Staf Opis Betanam Betupi Sri Aman mujur ngatur program beripai
SRI AMAN: Raban pengereja pengawa Opis Betanam Betupi Bagi Menua Sri Aman udah ngerichahka Program Ngerupan ti nyadika sebagi ari pengawa nyikap diri dalam Pekit ‘Edible Landscape’ Opis Betanam Betupi Pelilih Menua Pantu beserimbai enggau Ngintu 100 Taun Opis Betanam Betupi Sarawak ditu kemari.
Entara bukai batang tuju program tu iya nya dikena nerenak enggau ngemeranka asai ti ulih megai tanggungpengawa raban pengereja pengawa ngagai tikas pemanah rampa enggau pengelantang opis.
Kelimpah ari tu, dikena ngadaka pengeransing ulih bekerejasama entara pengereja pengawa opis ungkup pengelantang enggau pemanah rampa dalam opis.
Pia mega, dikena ngangkatka tikas pemereti ati staf bekaul enggau pemanah rampa opis enggau ngangkatka kreativiti sereta inovasyen dalam ngadaka rampa kereja ti kondusif.
Berindik ari tu, sesi meri poin ungkup pekit tu udah diatur kena 30 April tu.
Sama bisi dalam pengawa beripai tu iya nya Pemesai Menguasa Opis Betanam Betupi Pelilih Menua Pantu Fransto, Pemesai Menguasa Opis Betanam Betupi Pelilih Menua Sri Aman Jabu Saging, Pemesai Menguasa Opis Betanam Betupi Pelilih Menua Lingga Petrusia Ellen, Pemesai Menguasa Opis Betanam Betupi Pelilih Menua Engkilili Chadum Lawan, Menijer Besai Gerempung Orang Bumai Kandang Endur
Pantu Stanley enggau raban pengereja pengawa ari Opis Betanam Betupi Bagi Menua Sri Aman, Opis Betanam Betupi Pelilih Menua Sri Aman, Opis Betanam Betupi Pelilih Menua Linggai enggau raban pengereja pengawa Opis Betanam Betupi Pelilih Menua Engkilili.