Kualiti lada Sarawak patut terus dijaga, ku Martin
Dikena nentuka chap Sarawak Pepper (Lada Sarawak) ti dikelala dunya terus tegap dalam industri
SERIAN: Kualiti lada Sarawak patut terus chakah dijaga dikena nentuka jenama tauka chap Sarawak Pepper (Lada Sarawak) ti dikelala dunya terus tegap dalam industri.
Sapit Menteri Industri Pemakai, Komoditi enggau Pemansang Wilayah Sarawak, Datuk Martin Ben meri sadang penemu pemesai kebun lada dikurangka laban pemar ditapi pekebun enti kebun nya besai iya nya maya deka ngurus kelebih agi musim ngembuah ketegal nadai mayuh pengereja pengawa.
Iya bepenemu, taja pan pemesai kebun lada nya dikurang tang asil, kuantiti enggau kualiti lada nya terus ditan sereta dikemanahka agi enggau bantu ari Opis Lada Malaysia (MPB).
“Kitai deka neruska pengawa nanam lada laban lada Sarawak udah bisi jenama iya empu, jenama ti dikelala tauka tebilang dalam industri lada.
“Taja kitai ukai pengeluar lada pemadu besai tang kitai bisi lada ti bekualiti sereta bekualiti tinggi.
“Nya kebuah kitai deka neruska ambis nadai ngetanka pemayuh asil ti dikeluar kediatu sereta dalam timpuh ti sama ngetanka kualiti lada kitai,” ku iya.
Kaban Kunsil Nengeri
(ADUN) Kedup madahka pekara nya lebuh dirandau raban pengarang berita pengudah bejadi pengawa nutup Program Ngenegapka Pengemeran Industri Lada ti diatur MPB Taun 2024
ti diatur ba Dewan Babuk Barum, Kampung Bunan Gega / Punok di Tebedu, ditu, kemari.
Bejaku baru iya madahka, setipak enggau juluk opis lada ti ngemeranka teknologi baru
dikena ngangkatka industri enggau pekebun lada, MPB bejalai pengawa pemansik kelebih agi bekaul enggau ngena batang paip PVC nyadi tiang tauka tuat lada dikena nganti kayu belian ti tusah digiga diatu sereta kayu buan ti besemekih enggau lada.
Ku iya, MPB bisi bejalaika pengawa pemasik bekaul enggau nanam lada ngena chara fertigasyen ti ulih dikena nukar chara asal tauka lama.
“Sida (MPB) benung bejalaika pansik (bekaul enggau fertigasyen), lalu nyema nya nyadi nyata, aku ngasaika ukai semina orang tuai deka bekebun lada tang aku pechaya sida kebiak mega deka nyadika tu sebagi ari pengerindu sida nyadi orang bekebun mengeri.
“Sida ke di mengeri ti bisi kandang tauka kompaun rumah ke besai baka rumah teres ulih nanam lima ngagai 10 pun kayu lada di belakang rumah. Nya mega ulih meri asil ngagai kitai daam setaun,” ku iya.
Sarawak nengeri pengeluar lada pemadu besai di Malaysia ti enggau pemesai urung 8,015 hektar tauka 98 peratus ti mungkur 38,277 iku pekebun. Anggar lada ti dikeluarka menua ba taun 2023 urung 31,994 tan metrik.
Nitihka iya, dalam DUN Kedup bisi 292 iku pekebun nerima Skim Tanaman Lada Baharu (STLB) ari MPB ti mungkur 32.4 hektar pemesai enggau anggar bantu ti diberi sepenyampau RM1.2 juta.
Bisi 345 iku pekebun iya nya penerima Skim Tanaman Lada Matang (STLM) ti enggau pemesai 49.2 hektar enggau penyampau bantu RM1.3 juta.
Bisi datai ba pengerami nya kemari, Tuai Direktor MPB, Vincent Sawat sereta sida ti bukai.
“Nya kebuah kitai deka neruska ambis nadai ngetanka pemayuh asil ti dikeluar kediatu sereta dalam timpuh ti sama ” ngetanka kualiti lada kitai. Datuk Martin Ben