Henry Kanyan bansa Iban ti keterubah bisi label pemakai dalam tin diri empu
SIBU: Kunsilor Opis Kaunsil Kandang Menua Pesisir Sibu (SRDC) Henry Kanyan Vincent Rawing nyadi bansa Iban ti keterubah ke ngemansutka ikan sardin dalam tin enggau chap nama iya empu iya nya Henry Kanyan.
Kanyan madah, produk ikan sardin dalam tin Henry Kanyan tu iya nya rega RM5.80 setin enggau pemerat 425 gram tu deka dijual chara jual terus berengkah Januari nyin tadi.
“Naka diatu bisi 15,000 tin udah dijual. Tahit aku iya nya deka nyual 24,000 tin dalam timpuh enam bulan keterubah,” ku iya lebuh ti ditemu pengarang berita bedau lama ti udah.
Ku iya madah diri mutuska deka ngaul dalam industri pemakai laban ti bisi potensial.
Penemu deka ngembuan jenama tauka chap kediri tu berengkah pengudah iya ti bebakih enggau penempa fesyen ari Kuala Lumpur Dato Sri Anas Abdullah maya Karnival Selangau taun nyin tadi, ku iya.
Nitih ku iya, Anas tu ti madahka iya ngagai ‘bos’ sebuah kompeni pemakai di Ipoh, Perak dalam bulan Oktober taun nyin tadi.
“Aku madahka iya ngembuan pengerindu dalam ngembuan jenama pemakai dalam tin ari baruh label aku empu.
“Pengudah berandau, aku mutuska deka ngasilka sardin dalam tin.
“Iya madahka aku enda ibuh irau bekaul enggau pekara setipikit tauka label halal laban kilang sida endang udah bisi setipikit halal,” ku iya nerang.
Kanyan ti penatai asal ari Nanga Sekuau di Selangau tu madah, bala kaban ke bukai bisi ngenggaika idea ngena
nama diri empu nyadika jenama produk nyema deka matak pemeli bansa Islam.
“Aku madahka sida bisi sekeda produk ngena nama China pan nya ti nyadi pilih pemeli Islam.
“Aku madahka raban ti endang ditagit iya nya komuniti Iban ti endang ba kandang menua pesisir ke alai sekeda palan pengentap pendiau jauh ari kedai.
“Berindik ari tu, aku berundingka ikan sardin dalam tin ulih dijual laban ngembuan timpuh tan pengelama tiga taun,” ku iya nambah.
Kanyan mega nambah, iya
ulih ngurangka pengerugi enggau bejaul pemakai dalam tin.
“Endang enda ulih diterima nyema aku puntan nyual ikan sardin dalam tin dalam timpuh tiga taun.
“Nyema aku enda nyapai tagit bejual, aku ulih madahka pengeluar ngambi ngetuka pemansut dikena nyeliahka pengerugi,” ku iya.
Iya pengudah nya minta tauka ngelalau raban bansa Dayak ngambika mekuh ngagai industri pemakai sekalika enggau ngemansutka produk kediri tauka nengah pengawa betanam betupi.