Indu dara Dayak diperansang nyereta Pekit Kumang Gawai Dayak Sibu 2024

SIBU: Orang indu bansa Dayak ti bedau belaki beumur 18 nyentuk 30 taun diperansang sama enggau Pekit Kumang Gawai Dayak Sibu 2024 ti diatur ba Ringkat 6, Hotel Kingwood ditu kena 25 Mei tu.

Chairman Sarakup Indu Dayak Sarawak (SIDS) Sibu Angelyn Uchi Maseng ma

NGUJI: Poster pekit Kumang Gawai Renggat Bagi Menua Sibu 2024. dah, kelimpah ari nya, bala pesereta mesti ngembuan tinggi ambis nadai 5 kaki 2 inchi dikena nentuka sida ulih enggau pekit tu.

“Bisi RM14,600 perais mata duit disediaka ungkup pekit tu.

“Pekit tu iya nya entara program ti endang diatu maya Pengerami Makai Lemai Ngintu Mantar Gawai Dayak Renggat Bagi Menua Sibu,” ku iya ditu, kemari.

Nitih ku iya, pengerami makai lemai tu iya nya diatur begulai entara Gerempung Nasional Dayak Sarawak (SDNU) Sibu, SIDS Sibu, Gerempung Nasional Orang Ulu (OUNA) Sibu enggau Gerempung Nasional Dayak Bidayuh (DBNA) Sibu.

Beserimbai enggau tu, Uchi madahka Kumang Gawai Dayak Sibu (champion) deka mai pulai RM4,000 enggau jumpang, selampai, trofi, hamper enggau setipikit penyereta lalu Lulong (penuduk kedua) deka nerima RM3,000 enggau selampai, trofi, hamper enggau setipikit penyereta.

“Selinggar Matahari (penuduk ketiga) deka nerima RM2,000 sereta selampai, piala, hamper enggau setipikit penyereta.

“Sida ti ba penuduk keempat nyentuk kesepuluh deka mai pulai RM800 enggau setipikit penyereta ti nyadi perais sagi ati,” ku iya.

Iya madah, bayar ngerejista iya nya RM50 ungkup semua pesereta lalu enda dipulaika nyema bisi pesereta ke udah ngesahka diri enggau tang matak diri ari bepekit.

“Pesereta deka bepekit ba renggat keterubah nyema pesereta ti ngerejista lebih ari 10 iku.

“Hari bulan kepenudi bepekit tu iya nya 15 Mei 2024 pukul 5 lemai,” ku iya nambah.

Sebarang tanya ti silik enggau pom bepekit tau ngiga Senorita Salleh ba lumur telefon 013-8061265 tauka Caludia Dieo (0146526083).