Pengempu reta intelek ulih ngelaban ngena undang-undang enti ia dikena nadai pemendar
Pengempu reta intelek ulih ngena undangundang dikena ngelaban orang bukai ti nguna reta intelek sida enggau nadai pemendar.
Kaban Parlimen Lawas, Datuk Henry Sum Agong madahka, perintah Sarawak nengah Autoriti Multimedia Sarawak (SMA) deka nentuka semua hak reta intelek ti diasilka ejensi perintah Sarawak enggau komuniti di Sarawak dijaga awakka ulih dikena ngasilka penumbuh sosioekonomi Sarawak.
“Sarawak mayuh produk asal menua tu ti udah direjister ari baruh hak reta intelek nengah ‘petunjuk geografi’ ti mujur ngerembus makit dunya baka Lada Sarawak, Ikan Empurau Sarawak, Midin Sarawak enggau Beras Bario.
“Kitai di Lawas mega bisi produk unik ti patut dikelala enggau lengkas sereta direjister ari baruh jaga hak reta intelek baka Ikan Tahai Lawas, Garam Bukit enggau Beras Adan.
“Aku ngarapka SMA begulai enggau Opis Betanam Betupi Pelilih Menua Lawas lengkas ngerejister Garam Bukit Lawas enggau Beras Adan ari baruh jaga hak reta intelek,” ku iya.
Iya madahka pekara nya maya bejaku ba pengerami bejadi Seminar Penegap Reta
Intelek 2024 Pelilih Menua Lawas diatur SMA ditu, kena Hari Empat.
Henry Sum madahka, pengawa ngubah dalam rampa menua ekonomi, sekali ka di dalam menua, regional tauka antarabansa udah nyadika reta intelek nyadi elemen beguna dalam pengerembai pengawa dagang.
“Reta intelek ukai agi nyadi ‘protecti e legal shield’ aja, tang bisi fungsyen ti sebaka enggau reta nyata iya nya ulih dijual tauka dilisin ngena rega ti tinggi,” terang iya.
Ku iya, pengerejister reta intelek ari baruh undang-undang
ti bekaul, pengempu iya deka bulih hak eksklusif kena nyaga enggau eksplotasiyen reta intelek sida enggau tu nyengkaum hak ngaga, nguna enggau nyual.
Berindik ari nya, Henry Sum mega deka ke SMA nambahka penyuah ngatur program penegap reta intelek kena nentuka komuniti menua tu enda tinggal sereta dipadah enggau dilatih pasal pemesai guna reta intelek kena nyungkakka transformasyen sosioekonomi sida.
Dalam timpuh ti sama, iya deka ke Pengereja Opis Perintah Sarawak di Pelilih
Menua Lawas nambahka penemu dalam pekara bekaul enggau reta intelek sereta ngembuan inovasyen kelimpah ari ngiga penemu baru dikena ngangkatka kualiti nyendiaka servis ngena inovasyen ti dipejalaika.
Sama datai ba pengerami nya Pegawai pelilih Menua Lawas, Ladin Atok; Ketuai Unit Pelesenan, Inspektorat dan Penguatkuasaan SMA Steward Sayong enggau Pegawai Tadbir ari Unit Transformasyen enggau Inovasyen Sarawak Opis Premier Sarawak Zawawi Rambli.