Sukung enggau peransang beguna dalam proses ngajar anak: Dayang Noorazah
Sukung enggau meri peransang beguna dalam proses ngajar anak, ku Kaban Kunsil Nengeri (ADUN) Lingga Dayang Noorazah Awang Sohor.
Nitihka iya, mayuh nembiak ti mujur dalam pelajar sida iya nya asil ajar pemadu manah ari apai indai, pengajar enggau sekula.
“Nyadi apai indai, kitai patut meri peransang ngagai anak kitai nyentuk sida teulihka nama ti dikedeka sida.
“Nama ti beguna, enti sida udah mujur jemah ila, kitai ti nyadi apai indai patut meri insentif ngagai sida dikena meri peransang awakka sida mujur agi,” ku iya.
Iya madahka pekara nya maya bejadi Majlis Apresiasi Seri Gamang 2022/2023 (ASGA) Pusat Tingkatan 6, Sekolah Menengah Kebangsaan (SMK) Sri Aman di Dewan Suarah Sri , apin lama.
Dayang Noorazah nerangka, pengidup lama iya nya enda ngemeratka pelajar patut ditinggalka, tang apai indai patut ngaku iya nya pelajar nyadi pugu kena nempa mudal mensia ti nyaup ngagai pemansang menua.
“Enti nadai penemu tusah kitai teulihka pemujur. Pela
jar nyadi kunchi ti nyemayaka penyenang dudi hari,” ku iya.
Kelimpah ari nya, iya mega ngelalau apai indai ngambika nyimpan belanja ke penabat anak dudi hari, kelebih agi maya sida nampung pelajar ngagai renggat tinggi.
“Kitai ti nyadi apai indai patut ngemeranka inisiatif nyimpan belanja ke penabat anak dudi hari berengkah ari diatu.
“Kitai enggai enti maya anak deka nyambung pelajar, nadai belanja ti chukup.
“Duit simpan ambis nadai
tentu deka ngelempungka tating belanja dikena mayar masuk pelajar tinggi sida seraya nganti duit injau dikemendarka,” terang iya.
Ku iya, bisi sekeda apai indai enda nganjung anak sida belajar ngagai institusyen pelajar tinggi (IPT) perintah tauka swasta ketegal enda chukup belanja.
“Enti ari pun kitai nyimpan duit, kitai pechaya nadai penanggul deka ngamatka juluk anak kitai nampung pelajar ngagai renggat tinggi.
“Duit dikena melanja pelajar baka meranakka puku timpuh
panjai ti meri penguntung ngagai anak maya besai ila,” ku iya.
Sama bisi datai Pegawai Pelajar Pelilih Menua Sri Aman, Abdul Rahman Muhyiddin; Prinsipal SMK Sri Aman Roslan Mohamad Saini, Penolong Kanan
Tingkatan 6 SMK Sri Aman Hamdan Juli, EXCO Gerempung Apai Indai enggau Pengajar (PIBG) SMK Sri Aman ti ngarika Yang Dipertua PIBG Sesi 2022/2023 Mostapha Tugo enggau Penolong Kanan Kokurikulum Abdul Rahim Nawawi.