A festa de San-Pietrou, patran du pescahoù

San-Pietrou es ou patran du pascahoù e de pescairise. D’autre mestierante r’an encara pilhà couma Sant-Patran : u ferrà, u pica-peire, u murahoù e u gipié. A Marselha, San-Pietrou ese tamben ou patran du camalu. U pescahoù mentounasque an sempre venerà dame fervoù e alegrìa ou Sant-Patran, ou duménigue que suive ou vintanòu dou mes de San-Jouan : Messagrana cantàia à San-Miqué, proufessìa ent’e carriere dou païs dam’a stàtua dou Sant, juegue de marina, baleti e embraijhament dou goussou s’a spiaja couma se fa ent’ e vile e vilage da coustièra da Mediterrànea… U pichoù avìan pieijhé de sautà sus’e fiame dou batelou que brujhava puhi i mandavan susa grave e scalhe. Ou brujhament da barca de San-Pietrou s’acoumpagna de cante e de brandi s’a grava en tant qu’u pescahoù e u piejhencìe vogan sus’ e barque luminàie de lanterne e de fanà de tante couroù couma ent’una festa veniciana s’a marina dou pouart-vielh. D’un temp, u matalò brujhavan una barca pèr a Sant-Elmou dou  de Jougn pèr festà ou sen patran. Ancùhi, se san metù dam’u pescahoù pèr una festa coumuna. Un’ antiga credença di qu’ou gabian-gross, r’aucé de San-Pietrou, anounça a bourriana coura vora pressa de r’aiga. San numerouse u pouete mentounasque qu’an cantà a marina, u marinà e San Pietrou couma Marcel Firpo ent’a Cansan dou moussi : « Souta luna quiara, au chelou seren, vegou ent’una fara ou men campanen. A brisa que cara pioura ente r’auban… Dam’a bouca amara pensou au men Mentan ».

Puhi Louis Moreno e a Tartanella : « Cour’ a serena, roussa ese r’arena, à r’entrebren, pounent ven… ». E encara ou bardou, Marcel Viale « u braou pescahoù, Que cujhian e rese o tiravan u goussi, I eran un mouran. U counoushian toute : ou Fijou, ou Caro, ou Buchou, ou Coumissaret...E bràie repeçàie, mar revertegàie, e u pe sempre inù ».

Aquì ese Lucien Sicardi que canta aquest’ aumage à San-Pietrou :…O Sant-patran du pescahoù, du maren, Serva-re dou marrì temp. Scouta aquesta sounada, aquesta preguiéra de brave gente, que sus’ a terra, speran margrà ru amarouse enrabià, qù caru matalò s’arrecampan.