40 èsimu aniversari d’u Cuncursu de Lenga Munegasca
Ün achëst’anu, se festa u qarantèsimu aniversari d’a creaçiùn d’u Cuncursu de Lenga Munegasca e dunca, se a sitüaçiùn sanitària u permëte, a distribüçiùn d’i premi che se fà tüt’i ani a u mese de San Giuane gh’averà ün üncantu savuriu.
Da u 1976, segundu a vuruntà d’u Prìncipu Rainieri III, s’ümpara a lenga munegasca ünt’ë scoere. È u Canònicu Giorgi Franzi che è stau üncargau de l’ünsegnà e d’urganizà i cursi e ben vite, u nostru « primu maistru de munegascu » s’è mëssu ün testa de recumpensà d’üna manera sulana i alievi i ciü bravi. Qatru ani dopu, ün 1981, cun a so’ testardisa legendària, u nostru Canònicu, à truvau ün preçiusu apògiu ün Meria. U Mera d’un achëli tempi, u Sciü Jean-Louis Médecin e u so « adjoint » ün carga d’a cürtüra, a dinàmica Jacqueline Bianchi, se sun prun dai da fà per dà de l’andi a ün « Cuncursu de Lenga e Tradiçiue » creau cun l’agiütu d’a Direçiùn de l’Educaçiùn Naçiunala e d’u Cumitau Naçiunale d’ë Tradiçiue Munegasche.
 fin de l’anu, è stau urganizau ün esame cun üna prova scrita ün lenga munegasca e üna qestiùn sciü ë Tradiçiue.
U nostru bravu Canònicu vurëva mëte 20 a tüti ma gh’an fau capì che tüti nun purëvun iesse i primi ! Dopu ë prove scrite, i ciü bravi alievi erun seleçiunai per passà ün urale davanti a ün giürì cumpusau d’elüi d’a Meria e de soci d’u Cumitau Naçiunale d’ë Tradiçiue Munegasche e ün fìn finale, gh’era a distribüçiùn d’i premi ünt’a curte d’unù d’a Meria, a sëra d’a San Giuane. A l’iniçi, àn pusciüu remëte i premi cun a generusità d’a Fundaçiùn Latil e d’a Meria ma despoei, tanti meçeni partiçipun tambèn ëli fandu dunaçiue, permetendu cuscì de recumpensà i fiyoei de ciü un ciü nümerusi.
Anu dopu anu, u Cuncursu à evulüau, üna prova sci’a Stòria de Mùnegu è stà zuntà â prova sciü ë Tradiçiue e ë müniçipalitae sücessive cun a Scià Anne-Marie Campora e u SciüGeorges Marsan àn fau tütu çe che furëva per u mantegne vivu dàndughe sempre ciü d’ümpurtança e de fama.
A presença d’u Principu Suvràn e d’a Famiya Principesca à cuntribüiu a fà d’a distribüçiùn d’i premi d’u Cuncursu de Munegascu che mëte a l’unù u nostru parlà e ë nostre tradiçiue, üna festa briusa ma tambèn familiala « üntra nui ».
E cuma u dijeva u Sciü Henri Doria, alura presidente d’u giürì, « gardamu sempre ünt’a nostra mente eünt’u nostru coe, chëli e chële che àn travayau a creà e a svilupà achëstu cuncursu ». (DR)