Toyota Hilux
AFR
U onthou nog die wysie en die woorde van die advertensie: “Alles loop reg, altyd reg, Toyota?
Hierdie liedjie het die hele reeks voertuie uit die Toyota-stal ingesluit maar dit was veral die Hilux bakkies wat sedert 1969 by ons op die mark verskyn het wat werklik betekenis aan die advertensieliedjie gegee het. Hilux was vir dekades lank die onbetwiste kampioen, tot onlangs...
Die rede vir die bedreiging was van die kant van ‘n Amerikaanse ikoon wat lank gelede ook koning gekraai het en onlangs met byderwetse bakwerk en meganika opgang in die bakkiemark gemaak het.
Die bordjies is nou vervang met die nuwe Hilux wat met sy moderne voorkoms en moderne tegnologie, wat splinternuwe enjins insluit.
Die uiterlike tel by kopers en die nuwe vuurwa se voorkoms word deur die maatskappy as volg gestel: “Die mees treffende eienskap van die nuwe Hilux is waarskynlik sy gevorderde buite- ontwerp. Die ontwerpspan het daarop gefokus om ’n voertuig te skep wat ’n taai houding uitstraal, en terselfdertyd spreek van ’n sin vir vernuwing en verfyning t en einde ’ n meer emosionele verbinding tussen bestuurder en bakkie te ontketen” en verder “Aan die voorkant strek die uitstaande sierrooster met sterk horisontale stawe tot by die omvoukopligte, wat ’ n fris, verenigde voorkoms bied. Die wielnisse met hul ingeboude spierbulte laat die voertuig nog frisser lyk”. Tot sover Toyota se persafdeling.
Aan die binnekant is die paneelbord en uitleg verbeter (met ‘n inligtingskerm van 4.2”) om met die van ‘n gesofistikeerde buitelugvoertuig te kompeteer. Alles mooi en goed.
Maar wat ons die meeste beïndruk het is dinge wat nie van buite gesien kan word nie; die enjins is splinternuut en die ratkas en koppelaarfunksie is vars uit die oond. En dan is daar veranderinge aan die vering aangebring.
Weg is die beproefde en geliefde 2.5 en 3-liters wat vervang word deur nuwe 2,4 en 2,8-liter turbodiesels met dubbele bonokasse, 16 kleppe, vier silinders en veranderlike turboaanjaers met voorgemonteerde tussenkoeler. Die verdigting van die enjinkompressie is ook minder wat die meganiese stresfaktore op die lange duur laat daal en ook minder geraas veroorsaak.
Die nuwe 2,393cc-enjin ontwikkel 110kw teen ‘n rustige 3,400 rpm en stel 343Nm beskikbaar teen tussen 1,600 en 2,000 rpm. By die 2,755cc Gd-enjin word 130kw teen 3,400 rpm ontwikkel en 420Nm tussen 1600 en 2400 rpm vrygestel.
Vir outomatiese weergawes word die wringkrag tot 450Nm teen dieselfde toeretal beskikbaar.
Die sterker, kleiner dieselenjins het twee voordele; laer toksiese uitlaatgasse en beter brandstofverbruik. Volgens Toyota is brandstofverbruik van beide enjins 9% laer as hulle voorgangers en is die 2.4 GD die leier in brandstofdoeltreffendheid in sy klas; ‘n suinige 7.3L/100km.
Toyota laat ook ‘n keuse tussen drie petrolenjins; ’n “intree” tweeliterviersilinder met VVT-I tegnologie wat 100kw ontwikkel en 182Nm vrystel en die nuwe weergawe van die bekende 2,7- liter- VVTI wat 122kw en 245Nm beskikbaar stel - met 10% beter brandstofverbruik.
Die derde variant is natuurlik die bekende vierliter-v6 wat 175kw ontwikkel en oor 376Nm wringkrag beskik. Laasgenoemde is natuurlik die gunsteling van die Namibduinryers.
Nuut is ook die sesgangratkaste vir outomatiese en handratweergawes met ‘n vyfgang vir die intreemodelle. Sommige modelle maak gebruik van IMT “intelligente” handratskakeling.
Hierdie stelsel laat die enjinspoed by die ratkas aanpas wanneer ratte gewissel word; dit is nie nodig om soos in ou tye te “double clutch” nie!
Ander toerusting wat op sommige van die modelle beskikbaar is, is wegtrekhulp teen opdraendes en ‘n uiters doeltreffende beheerstelsel wanneer ernstige afdraendbeheer nodig is – weereens ‘n voordeel vir die ernstige Namibiese duinryers!
Die veldryvermoë is deeglik op die spesiale 4x4 toetsbaan beproef en suspensie-artikulasie is uitstekend. Verder word beheer oor die 4x4 modus vereenvoudig deur slegs ‘n draaiknop te draai wat die 4-2, 4x4 en laestrek-inskakeling laat inskop. Alles nou eenvoudiger.
Boonop gebruik die 4x4-modelle ook elektroniese remverspreiding deur middel van die Abs-stelsel om wielglipbewegings onder beheer te hou, selfs onder die moeilikste omstandighede.
Die vering is ook verbeter met nuwe hegpunte vir die agtervering wat ‘n meer gemaklike rit verseker as die bakkie nie vrag dra nie. Pluspunt.
Die nuwe Hilux is in drie weergawes beskikbaar; die werksbakkie, die Xtracab (een-en-‘n-half-bakkie) en dubbelkajuit om vir elke moontlike vereistes van kopers voorsiening te maak.
Die Xtra-weergawe het deure wat na agter oopmaak om beter toegang tot die bergruimte agter die sitplekke te gee.
Die Hilux reeks is nog steeds in verskillende weergawes beskikbaar ten opsigte van toerusting en dus ook prys – ingedeel in die werkeselmodelle, die SRX- weergawes en natuurlik die boonste klas, die Raider-modelle.
Net gou ‘ n paar woorde oor die algemene toerusting. By die intreemodelle is Abs-remme standaardtoerusting en het ten minste die bestuurder ‘n lugsak en is boonop toegerus met afstandbeheerde sluiting en ontsluiting.
By die meer luukse Srx-modelle kom daar ‘n goeie klankstelsel met ekstra poorte by. Die bestuurder het ook ‘n knie-lugsak om hom tydens ‘n botsing te beskerm.
Die Raiders beskik oor al die dinge wat die lewe agter die stuurwiel makliker maak soos ‘n tru-kamera, die opdraend en afdraend beheerstelsels, klimaatbeheer en volkeurTft-inligting-vertoonskerm.
Wat kos hierdie begeerlikhede?
Maak jou reg om enigiets tussen N$230,000 vir die basiese model tot N$600,000 vir die vlagskip te betaal.
In ruil kry jy ‘n voertuig waarin alles altyd regloop, deur ’n diensplan vir vyf jaar of 90,000 kilometer gedek word en wat elke 10,000 kilometer by die naaste handelaar gediens moet word.
Geluk met die nuweling, Toyota!
Daar is ‘n taai stryd wat kom - ons was by die bekendstelling van Toyota se nuwe Hilux.