Kanye West tat ti ota kutha ombinga momahogololo
Omuhikingalo Kanye West okwa ti kutya ota ka kutha ombinga momahogololo gopaupresidente, tashi vulika ya ka taalelathane nomulumentu ngoka ta ti oku mu hole, Donald Trump.
“Otu na okudhimhbulula ondjodhi yaAmerica pakwiinekela Kalunga, tatu tungathana osho wo okutholoma po onakuyiwa yetu,” osho a shanga ngaaka koTwitter. “Otandi ka kutha ombinga momahogololo gopaupresidente.” Omukulukadhi gwe Kadarshian West naElon Musk oya tsa kumwe naye noku mu yambidhidha. Ashike inashi yela mo othaathaa ngele West ota kutha ombinga tuu shili.
Okwa fa inaa shangitha edhina lye nokakomisi komahogololoFederal Election Commission (FEC) momahohololo gaNovemba. Edhina ndyoka lyi li popepi naandyoka lya Kanye West olyo Kanye Deez Nuts West, ngoka a li a shangitha oombapila dhe noGreen Party mo2015 nokwa fa inaa gongela oshimaliwa sha sha sigo oompaka. Shika kashi shi oshikando shotango West ta ti kutya ota kutha ombinga momahogololo gopaupresidente.
Pegandjo lyomapapa lyo 2015 MTV Video Music Awards, okwa li a ti ota ka kutha ombinga momahogololo gopaupresidente mo2020. Ashike muNovemba a za ko okwa li a ninguluka nokutya ota ka kutha ombinga mo2024.
“Otamu yolo shike?” osho a pula engathithi lyaantu mboka ya li po mpoka.
“Otatu ka patulula oompito dhiilonga odhindji,” ta gwedha ko ngaaka, ta ti okwa hala okulundulula edhina lye lyi kale Christian Genius Billionaire Kanye West. Kotwitter ye molyomakaya, mesiku lyemanguluko lyaUSA, West, 43, ina popya ngele ekuthombinga lye otali egama nongundu yopolitika yontumba. Nande ongawo, shika itashi shuwa oshoka oku na ashike oomwedhi ne komahogololo.
Opo a ka kuthe ombinga onga okandidate ya ithikamena, West oku na okumona eshaino lyaantu yomwaalu gwontumba noku ishangitha manga kuyele. Miitopolwa yilwe eishangithitho ndika olya pita nale nokuli, ashike muyimwe natango oku na ethimbo.
Ethigathano lyonuumvo unene olya talika lyi li pokati kaDonald Trump gwoRepublican, naJoe Biden gwoDemocrats.
Mo2018, West okwa li a ithanwa kegumbo lyepangelo, hoka a li konima a popi kutya Trump omuntu e na uukwatya wa ikalekelwa..
“Ondi hole omulumentu nguka,” West ta ti ngaaka, sho a li a thanekwa papatela omupresidente.