News in Khoekhoegowab & Oshiwambo

GABORONES – Kaidisidi !nâ hâ !gôab di ǂkhoan, ǀūsa a mâtin ge ǁōsan ge Botswanab di Okavango Deltas tawa ge hōhe, tib ge !aubǀguruna mûǂams departements danaba, ǂoa ge wekheb Donertaxs ai ge mî.

ǁÎb ge ge mî, mā-amsa tama !aus ǁaxasi tamab a nēba !khaisa, ǁnâgu ūǁnâsa tama xui-ao. Botswanab ge ǁîb hoaraga !hūbaib !nâ ǂgui ǂkhoana ūhâse a ǂansa, ǁaupexa 130 000 ǂkhoana. “Sida ge !nuriba ge !khō!oa 356 ǂkhoan ǁō hâsa, ǀawas Okavango Deltas dis !nâ tsî da ge nēsis kōse 275 ǂkhoan ama ǁō hâsa go ǁawoǁawo,” tib ge Cyril Taolob, ǂnûǁkhaeba ra direkteri, departements !Aubǀgurun tsî !Hū!nāsi ǀGuru!hanagu tiba, AFPsa !nubusîǂhôaro-i ge mîba. Taolob ge ge mî, noxopan !aromas nē ǁōgu disa ǂanǂui tamasa, ǁîn noxopa !nuriga !âuhâsa, !âidi nî dī-aihesen ge a sî !âron dide. Suid Afrikab, Zimbabweb tsî Canadab hâgu ge nē !âide ra dī. Nē kurib di !Khaitsâb !nâs tsînan ge ǁkhā ǀgaub ai 12 ǂkhoana ǀgam !garo!ā ǀkharikha ǀawas Botswanab dis !nâ ge ǁō hâ i. Nē ra !nurihe 356 ǂkhoan ge Elephants Without Borders (EWB), !aub!ûi!gâs !nans ra ǂâisa !oa ǁaupexa ǀnai !nona ǁkhâga ǁōhâ. 19 Gamaǀaeb 2020 di !nurib ra mîsa !oa di ge 70 persentgu di sorode ǁaupexa ǀgui ǁkhâba ǁō hâse ra ǁgau tsî !gau ra 30 persentgu di sorode kaise ǀgū ǁaeb !nâ ǁōhâse, ǁaupexa ǀgui tsēsa xu ǀgam wekhen kōse.”

Mike Chase, direkteri EWBs dib ge gere mî “!Gâi ǁgauǁgaus ge ǁgau ǁkhā da asa !kharaga kurina ūhâ ǂkhoan tsî !kharaga surigu tsîna ūhâ ǂkhoan ge īsa.” Naun hîa noxopa a ûitsama ge ǀnîna kaise ǂkhawusa !gûs !aroma, tsausa, ǀgaio!nâ tsî ǀnîna gākapusase mûsen, !gomse !gû tamas ka i o ǀirase gere !gû. “ǀGui ǂkhoab ge ǂgaeǂnamisa ra dī khami gere !gû, naun xab mâ ǀkhāb ǁgan garusa gere huihe hîa,” tib ge !nuriba ra mî.