Eepilima-skola moWalvis Bay itadhi tameke nena
SHO ooshikola adhihe moshilongo tadhi patuluka nena, aalongwa yomoshitopolwa shErongo, natango okwa tegelelwa ya kale momagumbo, sho oshitopolwa shika sha shuna pondondo ontintatu yepato.
Omutenya gwohela omupresidente Hage Geingob okwa igidha kutya oshitopolwa shErongo otashi kala pondondo ontintatu yepato, oshinima shoka sha tameke pokati kuusiku wonena. Shika osha hala kutya oosikola moshitopolwa shoka otadhi tsikile oku kala dha pata.
Aanona yosikola yomoondondo dhopetameko, oku za poPrePrimary sigo opondondo onti- 3 okwa tegelelwa ya tameke ootundi dhoshipala noshipala nena.
Omunambelewa omukuluntu moshikondo shelongo Sanet Steenkamp ndhika okwe dhi koleke koshikundaneki shoNampa ohela kutya oshikondo shelongo oshi li sha ilongekida noosikola ndhoka dha teelelwa opo dhi tameke nena odha gandja nale oolopota kuuministeli moka dha hokolola kutya odhi ilongekidha ngiini.
“Otwii longekidha okupatulula, nooskola adhihe okwa tegelelwa dhi tameke ongula, onkene otatu yi komeho oshoka oosikola adhihe odha ulika kutya odhi ilongekida,” Steenkamp ta ti ngaaka ohela.
Ooskola dhepangelo alihe pamwe naandhoka dhopaumwene okwa tegelelwa dhi tameke okulonga nena, kakele kwaandhoka dhomoshitopolwa shErongo moka omwaalu gwaantu ya kwatwa kombuto gwuuka komeho esiku kehe.
Oosikola adhihe odha kala dha pata okuza muMaalitsa okuza sho oshilongo sha lopota iipotha yotango i li iyali yoCovid-19. Pomutenya gwohela oshilongo osha li shi na aantu 485 ya monika ombuto ndjoka. Muule womasiku gaheyali mErongo omo amuka omwa lopotwa iipotha yi li 294 yombuto ndjoka, moka iipotha 73 ayihe ya lopotwa ohela.
Sho a pulwa kombinga yoshinima shoofooloma moka epangelo anuwa itaa li ka pulwa ngele okanona ka monika ombuto, Steenkamp okwa ti epangelo otali iyutha komalombwelo ngoka lya pewa kuhahende-ndjai Festus Mbandeka. Mbandeka okwa li a ti oofooloma odhi li owala nawa shampa owala shoka tashi ningwa shi li momuko gumwe noveta.
“Ooskola adhihe, kutya nee odhopaumwene, nenge odhepangelo odhi na oshinakugwanitwa shoku gamena aanaskola nande oya kala ya shaina oofooloma ndhoka,” Mbandeka ta ti ngaaka.