!Oabade mā ǂhau!nâsib ǀkha - Kapofib
Minister Frans Kapofib, Ministeris !Hū!nāsi ǁHōn, !Norasasib tsî ǁAwosasib dib, ge ǁîb ministeris !nâ hâ ǂhanub sîsenaona ge hōhō!nâ, in ǁanǂgāsabenan !oabade ra mā soagu ai nēsa ǂhanuse tsî ǂâuǀoa hâse dī.
ǂOa ge wekheb Donertaxs aib ge nē ministeris di ǂgaeǂguis !nans ǀkha ūhâ i ǂnûs !nâb ge ǁîba ge mî, nē beros di sîsenaon ǁnāti ī !ereamsa ǁanǂgāsaben !oagu tani hâ tsî hoaǁae !gâi!gân ase nî !gôasensa, ǁîn a !â nē ǂhanub dina hîa !ereamde ǁîb ǁanǂgāsabena surude hâb dise.” Ministeris !Hū!nāsi ǁHōn, !Norasasib tsî ǁAwosasib dis ge mûsen!nâxūs ase nē !hūb ǁaxasin !nâ mâ, ǁnāamaga da ge sada ǁaegu ǁnāti ī ǀawa!namn, !khō-omdi mâisan tsî !hūǀgoradi mâisana a ūhâ ǁoa hîa ǂkhawadī-aon xa nē tamas ka i o ǀnî ǀgau-i ai ǁama!khunihe tsî mā-amsa tama ǁaxasin ǁîn sîsenni !oagu hân !nâ ra !â tsî ǀhapixana,” tib ge ministera gere ǀgonǀgon!gao.
Kapofib ge ge ǂanǂan, ǁgariǁgarisa i asa nē ministeris nî ǀaweǁguigu hîa ǁnāti ī ǂgaekhâib; Mûǂuib 2030 dib, !Hū!nāsi Omkhâisens ǀAweǁguigu (NDPs) tsî Harambee ǀOmkhâis ǀAweǁguib tsîna sîsentsoatsoa kaisa. Ai!âb ge ministera ge mî, ministeris omkhâisens ǂgaekhâib nî !gâi!gâba sī!nâ hoarahus ǀgaub ministeris di dana ǀaweǁguib, kurikorobe ǀaweǁguib tsî sîsenaon ǁguiǂamdi sī!nâs ǁnâuguxoaǁguiguga ǂgaoǀkhāsa !harib ai a sîsenxa o ǀgui nî sī!nâhesa. ǁAnǂgāsabena !Oabade mās Mîǁguigu ra ǂhanuse sîsenǂuihes ge a ǂhâbasa, ǁîn !nâ-ū ǀguin sîsenaon mâs kōse !oabade ǂâuǀoa hâse tsî ǂgaoǀkhāsa !harib ai ra māsa nî !gāsa amaga, tib ge Kapofiba gere mî.”Namibiab ǁanǂgāsaben ge hoan xa a ǂoaǂamsa !oabadi ǀguide nî !khō!oas ge, ǁnāamaga da ge hoada di ǁguiǂgāsensa a ǂhâbasa î da ǀgapiǀgau !oabade mā tsî ǁnās !nâ-ū īǁkhā kai ǂhâbasa !norasasib tsî ǁawosasiban sada khoena nî ǀamasa. Hoa dītsâdi tsî ǁguiǂgāsens ǀkha ra dīhe sîsenni ge Mûǂuib 2030 dib !âubasende sī!nâs ai nî !ammâisa,” tib ge ge mî. ǁKhā soab aib ge ministera, koasa Namibiab ǀAwa!namna ge mā, ǂoaǂamsa sîsenni hîan !norasasib tsî ǁawosasiba !hūb !nâ !khōǀgaras !nâ ra dīb !aroma. -