- Venaani
OMULELI yongundu yompilameno yoPopular Democratic Movement (PDM) McHenry Venaani okwa li a ti kutya Aakwaswapo mboka ye li mopaliamende omavaya konima sho ongundu tayi pangele ya li inaayi hala a tule poshitaafula oshipopiwa tashi ungaunga nonkalo yopolitika ndjoka tayi fululuka moZimbabwe.
“Mbuka owo uuvaya wahugunina na kaye na ko nasha nonkalo yAazimbabwe, oSwapo ohela oya li ya ekelehi oshipopiwa shoka nda li nda hala shi ungaungwe nasho megumbo lyomutrumba gwopashigwana kombinga yonkalo yomoZimbabwe ndjoka tayi ende tayi nayipala,” Venaani ta ti ngaaka sho a li ta lombwele aatoolinkundana.
Ta ti sho inaaya hala okukundathana oshinima shika, aakwashwapo mboka ye li mopaliamende oya li ya hogolola okugamena ongundu yoZanu-PF ndele inaya gama kombinga yaazimbabwe mboka taya mono iihuna. “Oongundu ndhoka dha eta omamanguluko ohadhi igamene, pehala lyoku ipa omayele nokugamena uuthemba waantu muAfrica alihe lyomutenya,” ta ti ngaaka.
Ta ti nandoo Swapo inayi hala okupopya kombinga yonkalo yomoZimbabwe, onkalo onkene tuu tayi tsikile okunayipala. “Uudemokoli ou li moshiponga moZimbabwe, nomakuyunguto nonkalo tayi tengaatenga otayi ka fulukila moSADC ayihe, kasha na mbudhi ngele Swapo okwe shih ala nenge ine shih ala,” osh omulelei gwongundu yompilameno a ti ngaaka.
Ta ti ekuyunguto lyomoZimbawe otali limbilike nope na iinima oyindji. Ta ti shotango, open a eponokelo lyowina lyuudemokoli moshilongo tali ningwa kwaamboka inaaya hala okukanitha oonkondo okupitila muudemokoli.
Venaani ta ti oku wete ashike nokuli epngelo lyaZimbabwe lya fa lya thiminika lyaNamibia, nenge kutya shila epangelo lyaNamibia olyi ikolela mulyaZimbabwe moshinima shontumba sha simana.
“Nambia okwa thika po nokwa tungwa po nomidhi dhuudemokoli, osho wo esimaneko lyuuntu womuntu nooveta dhoshilongo. Ta ti omidhi ndhoka odha gwana okuulikila epangelo lyaNamibia nkene lyi na okupotokonona omaudhigu moshitopolwa. MoZimbabwe, aatoolinkundana ya tseyika nawa ngaashi Hopewell Chin’ono naJacob Ngarivhume oya li ya mangwa po muJuli sho ya li ya pula epangelo lyoZimbabwe African National Union-Patriotic Front (ZanuPF) lyi thige po oshipundi. Ngashiingeyi oya mangululwa.