News in Khoekhoegowab and Oshiwambo (Kundana)
GOMENǁGAMS – Hangana ǁAu!khōǂharugub sîsenaon ge ǂoa go wekheb Denstaxs ai ǁîn di 20 kurigu ǂnûǁkhaebas hîan Namibia Food and Allied Workers Unions (Nafaus) ǀkha ge ūhâ i !gaeǁaresa ge ǀamǀam, ǁnāpan ge ǀasa ǂnûǁkhaebas ǁnâuguxoaǁguiba Namibia Fishing Industries and Fisherman Workers Unions (NFI) ǀkha a xoa!gaos khao!gâ.
NFIs ge ǁî-aitsama mâbasen ǂharugub ǀhûs hîa Trade Union Congress of Namibias (Tucna) tawa a ǁanisa.
NFIs ge Hangana ǁAu!khōǂharugub sîsenaon, ǁnān hîa fabrikdi !nâ ra sîsenn tsî hurib ai ra sîsenn tsîn hoana nî ǂnûǁkhaeba.
ǁAnin ǂnûǁkhaeba-aob, Hangana ǂharugub ǀkhāba xub Eliakim Shihuyab ge ǂhôareao-e ge mîba, nēti ī ǀkharaǀkharas sîsenaon ǂnûǁkhaeba !nans dis kaise go ǂhâbasa isa, !gâi!gâxa ǂnûǁkhaebas di ǂhâǂhâsasib !aroma.
Nēti ī ǁnâuguxoaǁguib, Hangana ǁAu!khōǂharugub tsî NFIs hâra ǁaegub ge Sîsengu 11ǁî ǂHanumās 2007ǁî kurib dis !naka ge dīhe.
Olthaver tsî List !Nans di Sîsenaon ǁHōn Danab, Nelson Muhepab ge ge mî, kaise
ǂauna !harodi ge a !kharu!nâhesa nē ǀasa ǁgaragu tsî daoǁgaugu ǀkha ǂoaxas !aroma, hîa nē ǂnûiǂgāsa nî huise, !gâi sîsenǁareba ǂnûǁkhaeba !nans ǀkha nî ūhâsa ǁawoǁawos ase, sîsenaon !gâi!gâb kōse.
“Nē xoaǁguigu ǁkhāti ra ǁgūbas ge !gâi tsî ū!oasa sîsengu !gaeǁaresa Hanganas tsî ǁîs sîsenaon ǁaegu ai!gû-ū tsî hâǀgarasa ǁawoǁawosa,” tib ge Muhepaba ge mî.
NFIs di presidenti, Daniel Imbilib ge ge mî, nēs !nae!khaidi !gâ-ai Namibiab ǁau!khōǂharugub !nâ a !nae!khaisa.
“ǂGom!gâ da ge ra Ministeris ǁAu!khōs tsî !Gamhurib ǁUib dis nî ǀgūǁae, ǀasa ǀgaub !nâ Hanganasa mû mâtikōses Namibiab !nâ ǁguiri hâs ǂan!gâsa māsa, aiǁgause ǀasa fabriks Hanganas disa !khōǂgā hâse,” tib ge ge mî.
Imbilib ge xoxopa a mîs ge, NFIs ra ǂan!gâ tsî !gôa!gâsa, Namibiab hoa!nâ-aixase mâ!nâ mâsib, Covid-19 khoraǂuisens ǀkha ge hā tsî hâba.
ǁÎb ge ge mî, NFIs nî ǁawoǁawosa in !aruǀî Hanganas sîsenaona tā ǁaraǂuisa ǀgaub !nâ sîsen, xawe ǁîna !âǀhuru-aon ase ǂgâxa-ū.
Hangana ǁau!khōs ǂharugub ge a Oldhaver tsî List !Nans ǂHarugun di !â. -