Amnesty a pula EU a talulule elongelokumwe naLibya
EHANGANO lilile po eameno leenhauki loAmnesty International onghela ola pula Ehangano lOukumwe waEurope (EU) opo li talulule etokolo olo la ninga oku longela kumwe naLibya oshilongo osho sha shivikila nawa omahepeko eenhauki.
Libya, oshilongo shili monooli yaAfrica, osha ninga ondjila yokupitilwa keenhauki tadi di moAfrica oku ya koEurope oku dya pefyo laao a kala omupresidente woshilongo osho oule wefimbo lile Moamer Kadhafi.
Ashike EU okwa popila etwokumwe udafano lavo naLibya olo la pitika opo Italy a yambidide pashimaliwa omadeulo ovatonateli vokomunghulofuta waLibya.
Ashike ehangano leameno leenhauki lopaiwana opamwe nomahangano makwao, okwa popya kutya kashi li mondjila oku shunifa ko ovanhu koLibya, oshilongo osho sha nyika oshiponga –sha piyaanekwa koita.
“Ponhele yoku amenwa, ovanhu ava otava shakenekwa nomahepeko oufemba womunhu omaludi elili nakulili,” osho DianaEltahawyomukulunhuwoAmnesty mondingandinga nomonooli yaAfrica a ti.
“Nomomudo 2020 oilyolongo yaEU onghee tai twikile nokuya po nomilandu odo tadi fininike ovakainhu novalumenhu opo va kale monghalo ei yomahepeko.
“EU pamwe noilyolongo yaye nava talulule nelitulomo elongelokumwe lavo naLibya, inava pumbwa vali okuyandja ko omakwafo a wedwa po koshilongo osho shaashi pakuninga ngaho, otava yambidida omahepeko eenhauki oo taa ningilwa moLibya,” Eltahawy ta popi momushangwa waye.
Omushangwa ou wa nyolwa kehangano eli li na eembonge dalo moUK owa ningwa konima eshi EU a shivifa kutya ova tambula ko eindilo laLibya lelongelokumwe naEU.
Ashike Amnesty momushangwa waye okwa nyanyangida oimbuluma tai halula, ngaashi omadipao, omakano, omakwatonghonga, omahepeko makwao okolutu a nyanyaleka, omakwato mbabyona, oupika nominyeka da ningilwa eenhauki moLibya.
Omushangwa owa ulika yoo oiningwanima yeshunifoko leenhauki koilongo yado oku dja moLibya.
“Omolwa ehalo linene olo EU e na oku kangheka ile oku xulifa po emboboloko leenghauki oku ya koEurope, EU ota ningi keshe shimwe ta dulu –mwa katelwa nelongelo kumwe naLibya, opo a fye oshisho kutya eenhauki ina di mbobolokela mo moEurope, no ita tale ko koufemba womunhu.
“Ovanhu otava tauka koilongo yavo nelalakano opo vaka konge eameno koEuropeashikeohavatulilwapoomainda noku iwa moshipala moLibya omo have ke li hanga va taalela oixuna idule pwaayo va faduka po,” omushangwa tau ti.
Epangelo laLibya ola udaneka oku ninga omakonaakono moinima omu yomahepeko eenhauki.
– Nampa/AFP