ǂGiǂgosi ǀawemā-aob ge daogu hâ!nâ ǁgai mâsib xa ra tsâ
ǂNŪǂGOAES - ǂNūǂgoaes di !Garo!ā ǁhûi!nâǂharis ǀawemāaob, Elias !Kharugab ge ra mî, daogu di !gâi tama mâsigu !nâ hâs ra ǁnāti ī ǁkhōǁkhōsa autotsūke!gân hîa ǁKharas ǀkharib daogu ai ra hâga ra !aroma xūn di !âse !gawaǀîhesa.
! Kharugab ge ǀgūǁae ge ǂNūǂgoaes tsî ǀKhoes hâra daob ai hâ i autotsūke!gâb hîa ge !nona khoen di ûiga ǂoa!nâsa a !aromab ǂnamipe nēsa ra khom.
“Tita ge ǂauna !āde nē daogu mâsiba oresa hōbas ase !ereamsa tani hâ ǂnûiǂgāde ge ǀgūǀkhā, ǂNūǂgoaesa xu Aroab ǁga tsî ǂNūǂgoaes tsî ǀKhoes daokha !gâi!gâi!nâsa, xawe di ge ti dītsâde ǀgui !gâi harebe-i tsîna nēsis kōse sī!nâ tama hâ,” tib ge ǀawemāaoba ge mî.
ǁKhātib ge daogu di ! gâi tama mâsiba autotsūke! gân ǀguina !aroma tama hâ xawe nē ǁhûi!nâǂharis di sâuǁkhāsib omkhâisens tsîna !hâumâi hâ.
“ǁAupexan ge nē ta ra !hoa ǁaeb ai 90 persentgu ǁanǂgāsabena, ǂNūǂgoaes !nâ sī ra ǂharugudī, ǂoa!nâsan ra !ao nē !hūdaogu ai în xūna !nari-ūs khao!gâ amaga,” tib ge ge mî. ǂGiǂgosi ǀawemāaob ra mîsa !oab ge nē mâsiba ǁanǂgāsaben Aroab tsî ǀKhoes hâra dina, ûib ai!gûs !aroma a ǂhâǂhâsa marisihōǂgāsa ra ǂoa!nâ, ǁîn tsîn nau hâ ǁhûi!nâǂharidi khami omkhâisens !ēsa nî māhe, ǁîn daogu mâsigu !gâi!gâihe tamas kōse ǁîn di aiǂhanuga !hūǁîn ase ra ǂoa!nâ amaga.
Haroldt Maletzkyb hîa Aroab daob am!gâb ai ra ǂgarib ge ra mî, ǁîba i kaise a !gombasa, !garo!ās ǁga sâǁaega īsa, !nākorobeb ǁîb autos ai ra daob di ǁgai mâsib xa ra !aromahe ǂkhôaga ra dī-unu amaga. Kai !aorosasib nē daob ai hâb ge tsaraba, hîa !gāsase mûs ǁkhāsib !nari-aon diba ǀgaisase ra tsâǀkhāba.
Melvin Krohneb, ǂharugu-aob ase nē daokha ǀgui !nāsa wekheb !nâ ra sîsenūb ge ra mî, ǁîb ǀgaisa mari ǂoa!nâsa, !gōsase ǀnanuǁaegu !nâ ra hō!âsa.
Daogu di ǁgaisib xats ǁîb a gaxu daoba ǀNomsoros !nâ-ū ǂNûǂgoaes ǁga ra !nari amaga.
ǁÎb ge ra mî, ǀgam kurin !kharu hâse di ge mâsiba ǂanǂuis ôa!nâde a dīhesa nē daokha !gâi!gâi!nâs !âb ase, xawe i nēsis kōse ǀgui xū-i tsîna dīhe tamasa.
Daogu Mûǂams ǂnûiǂgās di mîgowaba-aos Hileni Fillemons ge ge mî, nē daogu ge 2004, 2005 tsî 2006ǁî kurigu !nâ ǁkhawa !gaohe hâ isa tsî !nari-aona ra ǂgan in māsa !garisiba hoaǁae sîsenū tsî daob!norasasib ǁgaraga ǁnâuǀnam. Koro kurigu di sîsenǀaweǁguib hîa 2023ǁî kurib ai ra toab, !nâb ge ǂNūǂgoaes tsî Aroab daob !gâi!gâisa a !khōǂgāsa tis ge Fillemonsa ge mî.