ǀKharisi mûǂamaos ge surigu ai !gao!gaosa ǂkhawadība ra !haraxū

ǀKhomas ǀkharisi mûǂamaos, Laura McLeod-Katjiruas ge ǀgaisa !khâikhomsa ǁnāti ī ǂkhawadīb hîa surigu ai a !gao!gaosab, !gōsase tarekhoesib tsî ǀgôan aib hîa nēsi ǀgaisase !hūb a ǂhabase hoa ǁhôadi !nâ danasa ǀgapi ra !gôagu ǀkha ra ǀhōǂuib !oagu.

McLeod-Katjiruas ge Covid-19 !hoa-tsî-ǁnâuǂharugub senters tawas gere ǁnaetisa ǀasa ǂans taren ǀkharib !nâ Covid-19 ǁkhaubas !nâ ra ai!gûs !nuriba mā soab ai ge mî, ǀarosen ra !gôagu ǂkhawadīb digu hîa tararesib tsî ǀgôan !gamǂuis ai hâgu a supu !hoahe ǁoasa.

“ǀGaisa !khâikhoms ase da ge sida ǀkharisi ǂgaeǂgui-aoda tsî nau hâ hoaraga ǁanǂgāsaben nēti ī uiuixa mâsiba ra mâ!oan tsîna ǀhûǁarebese, ai!gû ra mâsib surigu ai !gao!gaosa ǂkhawadīb diba ra ǂhara.

ǁKhāti da ge ǂkhawusa ǀhûhâsib ǁanin hîa tarekhoedi tsî ǀgôana !khōǂgā hân di khoesi ǂhanugu hîa ǁîn khoesisa ra tsâǀkhāgu di !khom!nâhesa ra !haraxu, aiǁgause ǀgūǁae ge hâ i ǀgai!khōs 12 kurixa ǀgôaros dis tsî !gamǂuidi ǁkhaubasens mâsib !nâ hâ tama ǁanǂgāsaben nē ǀkharib din ǀhapio ûigu ǂoa!nâs tsîna,” tis ge ǀkharisi mûǂamaosa gere mî.

Laura McLeod-Katjiruas ge ǀkharib di ǁanǂgāsabena gere ǁgoaǂui in ǁîn di !âsa ǀhuru tsî ǂhâbasa mâxōǀkhāsa ǂhanu-aisib ǂnûiǂgādi mâisana mā, ǁnāti ī uiuixa ǂkhawadīb ǀkha mâ !ûǂamaon ǁkhā ǁaeb ai !khōsis !nâ nî ūhe tsî ǁguisa ǁgaragu !oagu !oaǂuin hâ ǁkharaba nî hōsa ǁawoǁawos ase. ǁKhā soab ais ge ǀkharisi mûǂamaosa ge ǂanǂan, !khōdanas, kō!haras, xūn ǂhanuse nî !gûǁnâsa ǁawoǁawos tsî ǁaekorobe ǂansa mā!kharus ǀkharisi ! ereamxasib coronas ǂnamipe hâ ǁaxasigu dis nēsisa xu ǀKharisi ǁKhōǁkhōsasigu tsî ǂŌǂōsib !Khōdanas Komites di !ereams ase nî isa.

“Sida ge ǀkharib ase tsî ǂguro ministers beros ǀkha ra sîsenǁarese nî ai!gû Covid-19 ǂûna māǂuisa, ǁnā ǁhûiǂuisa tsî xoamâisa ǂkhawusa tsî a huisen ǁoa ǀhûhâsib ǁanin !aroma.

ǁKhāti da ge ǂûn xawas proxrammi ǀkhas tsîna ra ai!gû,” tis ge ǀkharisi mûǂamaosa ge ǀamǀam.