Ministeli zoyirugana kuna hara kuwapukurura nongarase depangero
Ministeli zoyirugana nougendero omu vanakugazara asi tavawapukurura nongarase depangero kehagero lyomvhura zeezi.
Awo kuna kugazara yimwe kuwapukurura elikwamo eli lyakarapo lyokupulisira nokuranda yininke ndi noprojeka omu vana kutara mapukururo ntanbi magwanekero nounkurungu ponoveta.
Eyi kayitente Ministeragona goyirugana nougendero Veikko Nekundi, posiruwo oso kakadingwire nongarase mbali depangero dakara mnoVenduka koyiha yombindakano mokutara asi ngapi dina fana moutano ou kaupwire.
Nekundi ogu kakadingwire ngarase momandaha, katente asi udigu umwe vana kumona vanangarase ava mokumbesitera yiruganeso yomahauto nsene yina teka ndi vana hepako yoyipe.
Age katente asi ministeli nare zina tameke ngesi newapukururo nongarase edi, sirongo nasinye omu vana kutara asi vahepa kukagusa po udigu ou wokupira yihauto konoministeli dimwe ntani konokampani.
Yimwe eyi vna kutara ngendeseso zokuranda ntani magwanekero nounkurungu.
“Nongendeseso nadinye dahepa kuretapo marunduruko gomawa kehagero tupu lyomvhura omu vana kuyimona asi nayikaretapo mauwa konongarase nadinye depangero, nye simpe twahepa kutara asi mukaro goEkonomi nago kuna kugutara momunene. Yimo ana kutanta Nekundi.
Ministeragona simpe kageve runyegenyo rwendi omu kamwene asi ukahe womahauto kuna katura tupu pomutenya muna kara asi mavango gokutura mahauto kapi vana kugaruganesa nye ponze mahauto kuna pongo.
Presidente kwayizeresa nawa nawa monombapira dawo asi situmbukira setu simwe kuna kara asi nongarase depangero twahepa kudiwapukurura.
Yiyo nye yina kuninkisa asi ame nayina ponili apa, mukugwanekera kumwe novakwetu ava vakara asi awo yiwo ava rugana yininke eyi nkenye ezuva omu tuna tura asi sopo muhowo kutara asi nongarase dahepa kumoneka nawa.
Yimo ana kutanta Nekundi.
Mukurona kevango lina lyongarase, momukunda gwaKhomas Mathew Shikongo katente asi awo ngesi kuna kara npomahauto gokusika ko 288 gana kundindira asi vagawapayike monongarase edi mbali.
Gamwe kuna karapo pevango olyo kutunda mvhura zina.
Udigu umwe ou vana kumona kuna kara asi aw okapi vana kara novapangeli vadiva Yuma mokuwapayika mahauto ngwendi Mercedess Benz ntani BMW.
Mahauto ngwendi BMW kwakara noyininke yago, kuvhura oli wapukurure nye alyo kuna kukutantera asi purako oku waliranda, yimo ngoso ana kutanta Shikongo.
- Nampa