Nambango okwa li e na oshigwana komutima – Ndevashiya
NGOLONEYA gwoshitopolwa shaHangwena Walde Ndevashiya okwa ti, oshitopolwa osha kanitha ependafule nomunangeshefa ngoka ali e na aakwashigwana komutima. Ndevashiya, dhika okwe dhi popi moonkundathata naKundana, moku dhimbuluka omunangeshefa omunene Johannes Shuufeni Shihepo, mwene gwOositola dhoNambango.
Shihepo ngoka a kala a tseyika nedhina ‘Nambango’ molwa edhina lyoongeshefa dhe, okwa hulitha mEtiyali lyo shiwike shika, moshipangelo oshinene shaCentral mOvenduka, kuuwehame wethimbo ele. Okwali e na omimvo 56.
“Shihepo otandi mu hokolola onga omumati gomwenyo omuwanawa, ito mu pewa lwaali, nonande owe mu adha poongeshefa dhe, otashi vulika waaha dhimbulile kutya oye mwene gwoongeshefa oshoka kehe gumwe otaya yolo naye po kati kokana,” Ndevashiya ta ti ngaaka.
Ta gwedha po ta ti, Shihepo okwa li omukondjeli manguluko, noongeshefa dhe okwedhi tameke sho a zi kombanda.
Paku dhimbulula sho a ihulu oku mona omunangeshefa nguka ihulathana Ngoloneya Ndevashiya okwa hokola ta ti, oya li ya tsakanane, pethimbo lyepato lyoshikongo, sho aakalimo yomondoolopa yaShikango kwa li ya pula omakwatho moshigwana.
“Shihepo okwa li gumwe go mwaamboka kwa ya gandja omakwatho giikulya. Omakwatho moshigwana ka kwali ge mu li ko kule nando,” Ndevashiya ta popi ngaaka.
Okwa gandja omahekeleko kaakwanezimo, aanangeshe ayehe oshowo ookume ke ayehe.
Shihepo okwa yambukile momukunda Onambango mOhaingu, moshitopolwa shaHangwena.
Omukwanezimo lye John Ndume ngoka a li a koleke e so lye, okwa ti, Shihepo okwa li omunangeshefa a tseyika nawa nedhina “Haidika yEndingosho”. Okwali e na oositola dhe dhina Onambango oshilongo ashihe oshowo moZambia.
Nambango okwa thigi ko oyana, naatekulu.