Taya kondjitha okudhima omundilo moondundu dhaKilimanjaro

Aadhimimulilo moTanzania onkene taya kondjitha okudhima omulilo esiku etitatu ngoka gwa tukuka moondundu ndhoka oondeendeka muAfrica dhoMount Kilimanjaro, aanambelewa moshitopolwa taya ti ngaaka. Omulilo ngoka gwa li gwa lotele sho ombepo ya tukuka, ogwa li gwa tukuka mOsoondaha ishewe momudhingoloko Whona, ehala ndyoka hali gondjo mboka haya londo ondundu taya longitha ondjila yaMandara naHorombo. Aanambelewa yokukondjitha omulilo oya li ya ti ombepo oya li ya gundjila mEtiyali. Omunambelewa Tanzania National Park Service (TANAPA) Pascal Shelutete okwa li a lombwele Reuters kutya ookadhimamundilo nayalwe otaya ende taya sindi omundilo, ta ti kutya oye li poku gu dhima thilu. Ookadhimamundilo omathele, aakwashigwana naanasikola oya li ya imanga kumwe ya kondjithe omulilo moKilimanjaro, ndjoka yi na uule woometa 6 000. Oondundu ndhika dhi li moshilongo shika shokuuzilo mwaAfrica ohadhi nana konyala aapashiyoni ye thike po50 000 komvula. “Onkalo yombepo oya gundjila na kaku na ombepo onene ndjoka tayi vulu okutaandelitha omundilo kiitopolwa yilwe,” Alex kisingo, omupevikuluntu gwoshiputudhilo shi li popepi shedhina College of African Wildlife Management ta ti ngaaka. Oshiputudhilo shika nasho osha tuma aalongi naailongi ya ka kondjithe omundilo.

“Omundilo ogwa li tagu vulu okukala gwa dhimwa kuyele ashike omundilo gwomoondundu ogwa piyagana,” ta ti ngaaka, ta gwedha ko ta ti kape na ngoka a monithwa oshiponga nomaliko gopaumwene inaga gumwa sha.