News in Rukwangali & Oshiwambo
MUKURONA govaporosi Sebastian Ndeitunga kageve marondoro konombunga politioka asi vahalihamesera komukaro gomudona komeho omu vana kukakondjera mavango momahoroworo gana kuwiza age tuna kumona asi mahoroworo gomadigu unene govakansela wonomukunda ntani wokugendesa nodoropa. Mahoroworo nye aga tuna kundindira kuna kukakarako mwa Mangundu 25.
Mosikondovike, nombudi vana kugava omu pokatji kombunga zaSWAPO ntani naIPCvahamenimo kavalihomokerere modoropa zaOpuuo omu kayitwarederere nzira vazisilike. Mosiruwo tupu sosisupi omu sayitunga zaNew Era nkera kavapulireko mukurona govaporosi, Ndeitunga katente asi Namibia kwamudiva asi kwakara nompora ntani udemokoli wakaramo.
‘’ Kuna kukareta eswahu nsene asi ose natukatura nye elikwamo lyetu pwahana asi pantambo zokukura siruwo esi somahoroworo. Udemokoli kapi wakara asi kuresapo mapiyagano ntani epiro kulizuvha. Twahepa kukara nongendeseso zina wapa ntani omu veta zetu zina kutupitisira ose hena tuzifumadeke mokukwama malikwamo getu gopaupolitika kapisi turetesepo matjiliso’, yimo ana kutanta ngoso.
Paveta kapi vayipulisira asi muntu nkenye akare nomatjiliso kowo vana kuruganesa unankondo wawo mokuhuyunga, ntani mokutura asi kupi oku navavhura kuhamena paupolitika ndi kombunga musinke.
Mokukwama mwendi, nombunga politika nadinye dahepa kukeverera vantu vawo nava vana kuvakwama omu navakara nefumadeko konombunga peke siruwo nye esi sina kara asi kuna kukondjera mapundi. Kapi nayimoneka nawa asi mbunga politika kuna kusindagura mbunga nkwawo.
Kapi nayimoneka hena asi makondjero gouhunga. Vantu vahepa kukara vanamanguruka pwavene valizuvhe momuwa nokuza konombunga edi vana hara. Nye twahakara asi nombunga dovantu dilihamesere momukaro dona ogu guna pilire kukara asi paveta yipo tukare nompora ntani sirongo setu siwape yimo ana kutanta Ndeitunga.
Nye age kagwedereko asi vaporosi navakara tavarugana momunene vatarere asi nombunga politika ngapi dina kurugana yipo asi pwahakahoroka yokurwanagana vahamenimo vahepa kulifumadeka omu simpe ana kuhundira asi vantu navenye tukareni konhi zoveta ezi azigendesa mahoroworo mosiruwo nye esi sokukondjera yipundi.
Dogoro ngesi vaporosi simpe kapi vana kara nosirapotwa nkenye, sokuhamena koupolitika vana ruganesa epuko mosiruwo nye esi kutunda tupu apa makondjero umpitisili kautamekere.