Nziye iukama sikiliti sa Kavango Shoki Kanjimi & Cecilia Iyambo
RUNDU – Linziye za Afilika zetuta zefubelu viki yefelile neli ukami sikiliti sa Kavango ya Upa, kutisa sabo kwa balimi ni sicaba. Ili kulatelela kuzuha kwa linziye mwa sikiliti sa Zambezi unumwaha. Linziye zetuta za Afilika kimufuta wa limpasu ze eza sikutu se sitiswa ki mayemo alihalimu. Likona kutisa butata kwa njimo mwa sikiliti. Yomuhulu yabona za njimo mwa liluko la njimo mwa Kavango ya Upa, Moses Munenge naize linziye hali tisi butata kwa sicaba, kono likona kusinya njimo ni mafulelo.
Munenge nabonisize hape kuli liluko la hae li itukiselize kufofaza kuzuha kwa linziye mwalikiliti zepeli za Kavango. “Luamuhezi milyani ni lisebeliso kuzwelela kwa sikiliti sa Zambezi, kukaswana kwaba kuli butata haki bobutuna sina mwa sikiliti sa Zambezi. Kono ni hakuli cwalo luitukiselize haiba inge kutaha butata, mi luna ni sikwata sesise si itutile kwasikiliti sa Zambezi,” nabulezi. Munenge natiiselize hape kuli sikwata sesili mwa sikiliti sicilaukile mi sina ni lyano la kulwanisa kuzuza kwa linziye, kone kubihilwe mwasilalanda sa Mukwe kutisa cwalo ni mwa Rundu.
Mubeleki wa liluko la njimo nakupile hape balimi kutwela mayemo alinziye, nikubiha kabunako kwa babeleki baliluko la njimo. Muliminyana ya cala matomato ni kabici kwamukulela wanuka ya Kavango, Immanuel Thadeus naize ubilaezwa ki butata bobutiswa ki linziye kwa licalano, sina haitinga kuzona kufumana masheleñi. “Lumwa sabo yakuli linziye likato feza licalano zaluna, zelu libelezi kukutula unumwaha. Muuso uswanela kulufa lisebeliso zakufaela linziye ze,” nekubulezi Thadeus.
Kono kutisa cwale usa lekile milyani kusileleza licalano zahae, kasamulaho akulemuha kuli linziye nese lili kwasimu yahae, mi naelelize balimi babañwi kufaela licalano zabona, kulisileleza kwa linziye. Mulimi yomuñwi Cecilia Hausona niyena ubilaezwa kikuzuha kwalinziye. “Kuzwelela halu lemuha linziye mwamasimu aluna lilu tiselize sabo. Nelu bilaela kuli likaswana zakala kuca matomato aluna. Halu beleki mi lupilela fakulekisa matomato kufumana masheleñi,” nekubulezi Hausona. Buñata bwa batu mwasilikiti babeleka mwa njimo, kuzwa kwa Uvhungu-Vhungu kuya kwa Mashare.