Omuhingi gwoambulasa a kandoma nokusa
Omukiintu omunamimimvo 54 ngoka a li ha hingi oambulasa yepengelo koshitopolwa shaShikoto okwa kandoma noku hulitha poshikando sho okabesa ka longelwa oku enda aamvu (oambulasa) hoka a li ta hingi ka kandoma. Nguka okwa sile poshiponga sho a nyengwa okupangela osheenditho noambulasa ndjoka a li ta hingi oya guko kopata noku alangata iikando oyindji. Oshiningwanima shika osha ningilwa kopate onene yoB1 Road, pokati kOkahandja noOtjiwarongo mOlyomakaya. Gumwe gwomaakuluntu yoNamibian Police Force ( NamPol) mOtjozondjupa Region, Deputy Commissioner Moses Khairabeb okwa ti, ombulasa ndjoka yali yi na aantu yaali mwa kwatelwa omuhingi oyali tayi zililele kombingayOkahandjayuukakOtjiwarongo sho oshiponga shika sha ningwa. Khairabeb ta ti aaniilonga yuundjolowele mbaka oyaadhika owala taya aluka koKatutura Intermediate Hospital koWindhoek hoka yali ya fala aamvu, yeya kutha koshipangelo shaNandjokwe mEtine nenge mEtitatano. “Mondjila yawo yoku galuka koWindhoek, sho kun a ookilometa dhuuka po90 oku ya mOtjiwarongo, okwa kanitha oonkondo dhoku pangela osheenditho pethimbo ali ta piti pomunkulo ololi, shoka sha eta oambulasa opo yi galangate iikando oyindji omanga inaayi kankama,” ta ti ngaaka. Omufaalelwa, omupangi ngoka naye omukiintu okwa mona oshiponga noonkondo nokwa falwa meendelelo koshipangelo kOkahandja hoka e li ta mono epango. Pethimbo lyoku ya komanyanyangidho, aakwanezimo yanakusa kaya li natango ya tseyithilwa, onkene edhima lye kalya li tali vulu oku tseyitwa. Omakonaakono gopolisi moshiponga shika otaga tsikile. –Nampa