Omahogololo moUS: Biden naTrump oombale dhi ihaka
DONALD Trump naJoe Biden oya kala nokumana ko America alihe taya ningi omahwahwameko sho omahogololo taga hweenene. Omupresidente gwogundu yoRepublican Trump, 74, okwa talele po Pennsylvania, moka taku hokololwa omo mu na omidhi dhomukondjithi gwe, omunamimvo 77 Biden gwoDemocratic Party.
Medhingonoko lyotango lyomahogololo gazi ko Biden, okwali ta ulike eli nawa, shoka tashi gandja omukumo kudja ota vulu oku sinda Trump.
Ashike esindano lye momahala gontumbwa itali wapa oku itangelwa okashila oshoka Trump oku na aayambidhidhi momahala moka muna aantu oyendji.
Sigo oompano aantu yeli oomiliona 90 oya hogolola nale, shoka tashi kaya momambo onga omuyalu omunene gwaantu taya hogolola moshilongo shimwe methelemumvo.
MoUS, aahogololi oya tokola opo ya topole omawi gaahogololi moongundu ndele haku yalula omiyalu dhaantu ayehe lumwe.
Opo a vule oku hogololwa, omuulikwa president oku na oku mona tango omawi geli 20 shinima shoka shaluka oshi putudhilo shomahogololo shopombanda. Na shi ikolelela kaakalimo, keshe oshitopolwa moAmerica oha shi pewa ooperesenta dhondhumba dhomawi geli 538 ngoka ga talika ko kutya ogo omawi gaahogololi ayehe.
Omukalo ngoka otagu fatulula kutya omolwashika omuulikwa hogololwa ta vulu okumona omawi ogendji gevule gomukondjithi gwe, ashike oye a dopa okusindana, ngaashi Hillary Clinton a ningi momahogololo gomo 2016.
Aalanduli yaBiden pethimbo lyomahwahwameko oya nyenyeta kutya aalandulu ya Trump otaya holola uuhwapitndi. Ishewe oya pe Trump uusama omolwa omaso gaantu ye vulithe po 300,000 ngoka ga etithwa koCovid-19, taya ti omupresidente ina longa shagwana oku gamena oomwenyo dhaakwashigwana.
Ashike Trump okwi ipopila ta to epangelo lye olya loga iilonga ya simana, mwa kwatelwa ekoko lyeliko ndjoka lya londo noopelesenta 33. Okwa tsu kumwe noshigwana kombinga yetaandelo lyoCovid-19, nokwa uvaneke kutya oteke ya a tidhe omunongononi ngoka ta kwatele komeho omapekaapeko epango nekeelelo lyoCovid-19 moAmerica Anthony S. Fauci, ngoka oye omukuluntu koshiputudhilo sho National Institute of Allergy and Infectious Disease molwaashoka ina longa iilonga ye.