Okanona ke na omeya momutse ta ka pumbwa ekwatho
Victoria Kaapanda
Rosalia Shimweoshili ( 21) a yambukile mOshakati ota indile omakwatho moshigwana okuyambidhidha naashoka shi na okukwathela okanonamati ke koomwedhi omugoyi Asser Kandali hoka ke na omeya momutse.
Kandali ngoka okwa li a teyagula po omwenyo gwomunamutimahenda Tuwilika Kayofa sho a li a mono onkalo yi na nokanona ye li muyo.
“Okwa li nda tsakaneke omuvali ngoka moshipangelo shaShakati, ta indile omuntu gumwe iimaliwa yolefa okuya kegumbo. Sho nda tala onkalo yokanona, osha li sha hilile ndje popepi nayo, e tandi ya fala kegumbo,” Kayofa ta ti ngaaka.
Kayofa ta ti mondjila oku ya thindikila, Shimweoshali okwa li e mupe ehokololo nokufatulula onkalo e li muyo nomwana. Ta ti nonando okwa li tayi ulike kombanda.
“Sho nda thiki pegumbo lyawo, onda li nda yemata unene. Omwenyo gwandje ogwa li gwa idhitike shinine, omolwa onkalo ye li muyo. Inandi vula oku shi mwenena, okwa li nde shi tseyithile aakwanezimo yandje mboka ya li ya gandja okashona ye na opo tu mu kwathele,” Kayofa ta popi.
Ta ti, shoka kash ina mbudhi, shoka tashi etitha ohenda natango, okanona hoka ihaka popi, ihaka inyenge ko ihaka mono ko. Kayofa ta popi newi lya gagala, ta hala okulila.
Moonkundathana naKundana, Shimweoshili okwa ti, onkalo e li muyo ondhigu, oshoka ke na nando iiyemo yasha, iha longo, ko okanona ihaka mono oshimaliwa shuulema nange shuunona wu li moluhepo.
“Okanona kandje oka li ka tandwa omvula ndjika muJuly, ihe itaka ti po hwepo, omutse otagu ende ashike gwa uka komeho,” Shimweoshili ta fatulula ngaaka.
Ta ti, kashi shi oshipu oshoka natango ita vulu okunyangadhala nasha omolwa onkalo yokanona, kape na ngoka ta vulu oku ka thigila.
“Okulanda ominambo niikulya owo uupyakadhi wotango, oshoka kandi na iiyemo yasha. Onkene otandi indile moshigwana shi yambidhidhe ndje nakehe shoka shi na po,” Shimweoshili ta indile.
Ta gwedha po ta ti, ota ka pandula kehe gumwe te ke shi ninga, nuunene ota pandula omunamutimahenda ngoka a li a tuminwa kuKalunga “Kayofa” kwaayihe e muningile sigo oompaka.