Kansela Shikulo a kumagidha oshigwana shi ka mone elongo lyopombanda
Ka n s e l a gwoshikandjohogololo shaKahao Leonard Shikulo, ota kumagidha aakalimo yomoshitopolwa she ya ka mone omalongo gwokuhogolola, oshoka nuumvo itapu ka hogololwa nomashina, ihe onopena nombaapila.
“Andi kumagidha kehe gumwe a ka mone omalongo gwokuhogololwa taga ka ningwa opo kehe gumwe a ka kuthe ehogolole lyi li mondjila momahogololo twa taalela ngoka taga ka kala ko momasiku 25 gaNovomba nuumvo,” Shikulo a kumagidha.
Ta ti, omalongo ngoka otaga ka kala ko okuza momasiku gaheyali gOlyomakaya tage ya sigo 22, pomahala ga yooloka moshikandjohogololo ashihe shaKahao. “Opo kehe gumwe a hogolole omuleli gwehalo lye, okukeelela okuhepeka komawi, oy ena okulongwa nokweendithwa po nkene haku hogololwa nopena nombapila, nkene ye na okusindolola,” Shikulo ta ti ngaaka.
Ta gwedha po ta ti, shika osha simana oshoka omawi ogendji ohaga ka hepa, omolwa aantu inaya hogolola mondjila, nomawi ngoka ihaga ka longithwa, ihe ohaga ka ekelwahi.
Shikulo ta ti, oshiithanene shoka osha nuninwa oshigwana ashihe, aaleli yoongundu dhopolotika, aaleli yoongeleka, aaleli yopamuthigululwakalo nosho wo aaleli yamwe yopashigwana opo wo ya ka thikithe uuyelele kwaamboka itaya ka mona ompito okuthika momasiku ngoka.
“Omawuyelele ngoka otaga ka gandjwa kaanambelewa yokomisi yokuwil ika omahogololo moNamibia, mboka ye na uuyelele awuhe nkene omahogololo ge na oku enda,” Shikulo a fatulula.
Okwagwedhapo ta ti,nonando omalongo otaga ka gandjwa natango miikandjohogololo ayihe moshilongo, ota ka pandula kehe gumwe ta ka kutha ethimbo lye, a ka mone omalongo.
Kansela natango okwa kumagidha kehe gumwe a kuthe ombinga momahogololo, oshoka oshigwana oshi na omukalo gwokwiinyolitha okuhogololo, nomwaalu gu li pombanda ihe, omahogololo sho taga ka thika , aantu aashonashona taya ka thika.
Shikulo natango okwa hiya oshigwana shi ye koshigongi oshinenenene shoSwapo shoka tashi ka kala ko momasiku 13 gaNovomba mOkahao.
“Otandi hiya kehe gumwe a kale a thika esiku ndyoka, opo tuye tupulakene shoka omupopi gwesiku, omupilima gwoshilongo Nangolo Mbumba, etumwalaka etu na esiku ndyoka,” Shikulo a popi ngaaka.
Kansela gwoshikandjohogololo shaKahao Leonard Shikulo