Ovanafikola ve dule po2 000 mOhangwena inava shuna kofikola
OMUKULUNHU wiliki moshikondo shehongo moshitukulwa shaHangwena, Isak Hamatwi, okwa ti ovanafikola veli 2024 vomovanafikola 96 706 ovo ve li moipundi moshitukulwa omo inava shuna kofikola okudja muJuni eshi ovanafikola vakwao va shuna kofikola konima yepato.
Hamatwa edi okwe di popya pefimbo loshoongalele shaavo ve na mo onhumbu mehongo sha li kendiki ledina Eembaxu Billy Mwaningange Rural Development Centre mOmaandaxa. Ta ti, ovanafikola ashike veli 94 682 va shuna kofikola eshi ehongo loshipala noshipala olo la li la kalekwa kuyele neudo molwa etandavelo lombuto yoCovid-19 la alulilwa po. Ashike Hamatwi okwa yeleka kutya, ovahongwa 174 vomwaavo inava alukila kofikola ohave li hongele komaumbo oku pitila komalungula, ile hava ka tala oikwafifo-longo yavo keefikola davo. Ta ti ovahongwa ovo otave li longo oku pitila komalungula shaashi osho shili ehoololo lovadali vavo. Ta weda po yoo ta ti, ovanafikola 443 ova fimbapala pefimbo lepato. “Ovo va ninga omateelelelo otashi dulika va valulilwa mwaavo ihave ya kofikola ile mwaavo hava i kofikola shaashi okaana ngeenge oka fimbapala itashi ti itaka i vali kofikola,” Hamatwi ta yelifa.
“Ta ti eefikola adishe moshitukulwa shaye oda patuluka shaashi ode li ufa komilandu doCovid-19. “Otu na eefikola dinini koitukulwa yokoushai odo kadi na eepomba, ashike otwa longifa eetenga opo di kale di na omeva,” omukulunhu wehongo ta yelifa. Hamatwi ta weda ko yoo kutya ounona Ovaangola veli 1300 ohava tauluka eengaba keshe efiku nokuya kofikola moNamibia.
–Nampa