Kuzuha kwa linziye kutalimilwe

WINDOKO – Linziye za Afilika zetuta zefubelu zene bihilwe mwasikiliti sa Zambezi litalimilwe, kasamulaho sikwata sa macaziba nesi lwanisize linziye kaliviki zesikai.

Taba yeo ne konahalile kasamulaho si sole sa naha Namibia, nesi isize fulai mwasikiliti kweli yefelile, kuyo tiiseza twaniso ya linziye zene litaselize lihekele ze 500 zamafulelo. Linziye neli bihilwe sapili la 12 Muyana kwalibaka zecwale ka Muzii, Namiyundu, Ivilivinzi, Lusese, Ihaha, Nakabolelwa, Masikili, Malindi, Ibbu, Ngala, Muyako, Mahundu, Macita, Kikiya, Kanono, Muketela, Linyanti, Chichimani ni Kapani.

Sikwata kuzwelela kwa sikolo sesi pahami sa Unam nesi kopani ni sisole sa naha ni liluko la njimo mwasikiliti sa Zambezi, kulwanisa linziye zetaselize lifasi la Afilika.

Mwangambolo ni New Era mubusisi wasikiliti sa Zambezi Lawrence Sampofu, nanyatezi kuli mayemo atalimilwe kasamulaho aswalisano ya likwata. “Lusa sweli kufaela linziye, mi mayemo atalimilwe. Luna ni batu baba faela ka mautu ni kalimotikala. Mi hape lubeselisa fulai kufaelela mwahalimu. Mwalibaka mone kufaezwi likokwani lifukuzehile, kono lisweli kuyo kuta,” nazibisize.

Sampofu naize seba faezi lihekele zelikana 4 000 mwalibaka zetaselizwe zene, mwalilalanda za Kabbe ya Mbowela, Kabbe ya Mutulo, Katima ya Matakanyani ni Sibbinda.

Nabulezi hape kuli milyani yene babelekisa sapili neli sifanu kwa limunanu. Kono, kasamulaho macaziba bakena mwatwaniso, neba kalile kubelekisa milyani yesakoni kubulaya likomu mwalibaka zetaselizwe.

Ili kutoloka kuli balimi neba sa tokwiwi kututisa limunanu za bona, pili kusika faelwa kale. Milelo yeñwi neli kukwacisa linziye hali lobezi ni kuli kutula kuyofepa litapi ni likuhu. Sikolo sa Unam sinze si ikopanya ni sicaba kubaluta zesweli kuezahala, ili kutusa muuso kuze usweli kueza.