Agribank ikwalula ofesi yenca mwa Katima
WINDOKO – Panka ya njimo ( Agribank) nekwaluzi ofesi yenca mwa Katima Mulilo, ili kubata kualabela kwalitokwahalo za sicaba, ni kuli babeleki bano belekela mwaliofesi sakata, haba alabela kwalitokwahalo za balimi mwasikiliti sa Zambezi.
Nihaike panka ise ibile mwa tolopo ya Katima Mulilo lilimolimo, ofesi yenca inanula mayemo apanka kuli ibonahale kwa sicaba ni kufumaneha kabunolo. Mwa manzwi ahae ane abalilwe ki Peter Mwala, mubusisi wa sikiliti sa Zambezi Lawrence Sampofu, nabulezi kuli ofesi yenca ya Agribank mwa Katima Mulilo ya amuhelwa, mi ki sisupo sa sepo panka ifumani mwatolopo ni sikiliti kabupala.
Sampofu kacwalo nasusuelize bayahi basikiliti sa Zambezi sihulu basali ni babanca, kusebelisa ofesi ni lisebelezo zetisizwe bukaufi. “Nataba kulemuha kuli Agribank itisize lisebelezo za babanca ni basali ze nolofalizwe. Ki takazo yaka kuli buñata bwa babanca ni basali kuzwelela mwasikiliti se, baka sebelisa lisebelezo zeo kuba balimi. Sikiliti sa Zambezi sina ni mubu onunile ni mezi amañata, hamu ekeza basali ni babanca babana ni ciseho, lukona kueza sikiliti sa luna kuba sizuma sa lico sanaha kaufela,” nekubulezi Sampofu. Mwamanzwi ahae muzamaisi wa Agribank Sakaria Nghikembua, natolokile kuli panka ibile mwalieto la cafazo mo kuiputezi kutokwa likunutu, kutahisa misebezi ni kuhulisa mayemo asifumu.
“Kwatutengo totu luilwe ki muuso luba pili, nakona kubulela cwalo. Luezize hande mwalitaba za kutalima kamaiso yesa zikinyehi, kamaiso ya mwahali ye tiile, mi lulatelela mulao wakuleka lika wa muuso, mi kinto ya butokwa kuluna. Haiba ofesi izamaiswa hande, kubunolo kuli izwelepata,” nabulezi.
Zeo halilicwalo muinasipula wa panka Michael Iyambo, naitumezi kwa panka kalikezo zateñi mwa sikiliti, moku iputezi likelezo za njimo ni kufa lituto, teñi balimi ba 682 neba tusizwe mwa sikiliti. Nasusuelize babeleki mwasikiliti kuzwelapili ni musebezi omunde.
“Halubeleka hande, nikolwa kuli luka konkiseza mayemo aluna kakuba ofesi yeluilwe kimuuso ye beleka hande hahulu,” nafelelelize.