ECN ota yandje eekopi doumutwe vomahoololo
EHANGANO loElectoral Commission of Namibia ( ECN) ota li ka tameka okuyandja eekopi doumutwe vomahoolol moikandjohoololo aishe 121 moshilongo ashishe, oku tameka mefiku eti-16 Novemba fiyo omo 24 Novemba 2020.
Momushangwa woikundaneki oo wa yandjwa koECN mEtine, omukulunhu wehangano, Theo Mujoro, okwa ti ovo tava ka pewa oukalata ovo vo ashike va teya oukalata vavo ile ve va kanifa, ashike ita pa ka ningwa omalishangifo mape.
“Onghene ovahoololi aveshe ovo veli shangifa ndele ova kanifa oukalata vavo ile va teka otava dulu oku indila opo va pewe oukalata vape, vo va ka dule oku kufa ombinga momahoololo opaitukulwa nomalelo eedoolopa momafiku oo a ufwa. Okakalata komahoololo oke na oshilonga neenghono shaashi oko haka longifwa oku tongolola omuhoololi pefimbo lomahoololo,” Mujoro ta ti.
Ta ti ovo va kanifa oukalata vavo, nova hala va pewe oukalata va pe, nava twaalele omikanda da yela, da kwatela mo eano tali di kopolifi, olo tali popi kutya omuhoololi okwa kanifa shili okakalata kaye, okamutwe koshilongo ile opasport ile okakalata kaye katwima (Green card) ke na omafiku eli pefimbo.
“Okuyandja oumutwe vape otaku ka ningwa meti-16 Novemba fiyo omo24 Novemba 2020 okudja po 08h00 fiyo opo 17h00, moshilongo ashishe. Momafiku 23 Novemba mo ita mu ka yandjwa oukalata omolwa omahoololo owina oo kwa tokolwa opo a kale ko mefiku olo,” Mujoro ta ti. Omahoololo oilando noopaitukulwa moshilongo ashishe okwa tokola opo a kale ko mo25 Novemba 2020 –taaka kwata efiku limwe ashike.
-Nampa