Ntabo Ntaberi: a pewa ehandu longhalamwenyo modolongo
OO a li nale ondjai yoita moDemocratic Republic of Congo okwa pewa a handu longhalamwenyo modolongo, omolwa omahepeko a ningila ovanhu, a kwatela mo omadipao nomakwatonghonga mahapu.
Omhangu oya handukila Ntabo Ntaberi molwa omadipao, onghonga, oku ninga ovanhu ovapika vopaixulo nekuto lounona veli koshi yeedula 15 moukwaita.
Etokolo eli ola ningwa konima eshi ovanhu veli 178 va yandja omaumbangi avo.
“Etokolo eli ola eta eteelelo liwa mokati kaavo va ninga oihakanwa yoimbuluma oyo ya longwa pefimbo loita moDRC: omalilaano avo okwa udika okwa katukiwa onghatu,” Leila Zerrougui, wehangano loku kaleka po ombili moDR Congo ta ti.
Ntaberi, oo a li yoo ashivika nedina Sheka, okwali umwe womovaleli vongudu yopaukwaita yedina Nduma Defense of Congo (NDC), oyo kwali hai longele moshitukulwa sha North Kivu.
Oushilo waDR Congo oo una imwe yomoitukulwa iyamba ngee tashi ya keedjo dopaushitwe moshilongo owa kala wa piyaanekwa koita neenghono.
Oita yopashiwana moDR Congo oya li mo pokati ko1998 no2003, ashike ovanamapove ava voNDC onghene va twikila noku hepeka ovanhu moushilo woshilongo omo paife mu na ovakalekipo vombili voUN.
Momudo 2011, Epangelo ola tokola opo Ntaberi a kwatwe po taku tiwa oye a kala a kwatela komesho omahepeko ovakwashina moushilo pokati ko2010.
Pefimbo lomapiyaano oo, oilyo yoNDC vati oya kwata onghonga ovanhu veli 400 nokudipaa vefike po300. Konyala omaumbo 923 neefitola 42 odeli teelwa noku vakulwa oinima, novakwashiwana 116 ova kwatwa po noku ningwa ovapika shiheli pahalo lavo. Oikulumanene aishe ei oya ningwa momikunda 13 da kunghula Kibua-Mpofi.
Ntaberi okwa kala a faduka po noku holama oule womido hamano ashike okwe ke li yandja kovakelekipo vombili vaUN moDR Congo muJuli 2017.
Okwali a pangulwa pamwe navakwao vatatu mwa kwatela ondjai yoita yadja kongudu imwe ilili. Ondjai oyo nayo oya pewa ehandu longhalamwenyo omolwa oikulumanene ya longwa moNorth Kivu. Ehandu lavo oveli pewa pexulilo leemhangu odo da ningilwa moGoma mOmaandaxa.