Omahogololo oga enda nawa
Oshigwana oshi uvite ombili komahogololo ga li ko omwedhi gwa yi, gookansela yomiikandjohololo nondoolopa, ngoka ga ningilwe momasiku 27.
Helaria Newaka okwa ti, omahogololo oga li pawuyuuki noga enda nawa. Ta ti, nonande ha kehe umwe a li ahogolola, oshigwana osha kambadhala.
Mbuka owo uuthike pamwe, oongundu odhapumbwa okupathana oompito dho kulela, ihe ha ngundu yimwe ashike tayi lele,” Newaka a popi ngaaka.
Ta ti, ota pandula oongundu dhoompilamena sho dha hulako oongaku eta dhi sindana miitopolwa yimwe moshilongo.
Newaka ta ti, moshiwambo oha kuti oondunge ihadhi gwanene omutse gumwe, onkene oshawapala oogundu dhi tulwe pamwe opo dhi tulilathanemo omayele ga yooloka, okulela oshilongo nawa.
“Ookansela ayehe ya mono oompito dho kulela nuumvo, nayalele nelandulathano, nombili oshowo nohokwe yokulela nokuhumitha iitopolwa ya wo komeho.
Simon Simon gwokoshitopolwa shaMusati okwa ti, oteshikoleke kutya omagololo gwonuumvo oga ende nawa. Ta ti, sigo onena ina uva omanyenyeto kutya opena ongundu inayi yalulwa nawa.
“Onduuvite nawa oshoka ongundu yandje ndjoka ndahogolola oya sindana. Shoka tashi ulikilendje kutya omahogolola oga enda nawa nonda nyanyukwa.
Simon okwakumagidha wo natango aaleli ya gwanithepo omawuvaneko gawo yakala taya popi ethimbo lyiigongi ya wo.
Ta ti, oshigwana oshahogolola sha ikolela komawuvaneko geni, onkene naga tulwe miilonga, oshoka ehumokomeho olyo lyapumbiwa koshigwana.
Lukas Netumbo gwomOshakati, okwa ti, ehangano lyokomisi yoECN nalyo na li ningepo omalunduluko, esiku limwe ina li gwana.
“Omuntu ngele okuna okahogololitho ke, na pitikwe okuhogolola kehe mpoka e li momahogololo guukansela, oshoka aantu ohaya vulu okutembukila koondoolopa dhimwe omolwa inakugwanithwa ya yooloka,” Netumbo a popi ngaaka.
Agwedhapo ta ti, shoka osha imbi oyendji kaayahogolole oshoka uukalata wa wo wokuhogolola itawu tsu kumwe nomoshikandjohogololo moka ya yi adha pethimbo ndyoka.
Netumbo ta ti, ota pandula wo natango omahogololo gwonuumvo, inaga kwata ethimbo ngaashi omimvo dha piti.
Ta ti, nuumvo aahogololi inaya kalekwa momikweyo ngaashi shito, onkene ehangano lyo ECN na li tsikile nasho.