Opolisi mOmusati ya ilongekidhila ethimbo ndika lyomatango omanene
Opolisi moshitopolwa shaMusati oya londodha aakalimo yomoshitopolwa shoka opo ya ikaleke kokule niimbuluma pethimbo ndika lyomathimbo omanene oshoka, oya ilongekidha okulwitha iimbuluma moshitopolwa shawo.
Shika osha li sha kwashilipalekwa komukuluntu gwopolisi moshitopolwa moka, Titus Shikongom Omaandaha goshiwike shika.
“Ndika olyo ethimbo aantu oyendji taye ya okutalelapo aakwanezimo yawo, oshowo okutalelapo omahala gomonooli. Iiponga yomoondjila oshowo iimbuluma ohayi holoka pethimbo ndika,” Shikongo ta ti ngaaka.
Ta ti, opolisi oya ilongekidha, okukaleka po omalandulathano agehe gomoondjila, okukeelela iiponga oshowo okugamena oshigwana okulongelwa omiyonena.
Ta gwedha po ta ti, itaya ka pitika aahingi kaaye na omikanda dhokuhinga moshitopolwa shawo oshowo omuhingi e li kohi yomalovu.
Shikongo ta ti, opolisi otayi ka kala pokati koondjila ya ninga oomboloka, naakwashigwana otaya indilwa ya kale taya longele kumwe nopolisi okulopota iiningwanima inayi uka. “Otatu ka kala natango tu na opolisi yi li miikonga tayi longitha omikalo dhokulwitha iimbuluma, onkene oshigwana otashi indilwa shi yambidhidhe opolisi opo ya adhe esindano mwaashoka, opo iimbuluma yi shonopale,” osho Shikongo a hokolola ngaaka.
Okwa popi kutya aniwa omumvo gwa zi ko, aahingi yamwe oya li ya yi konima yekumba pethimbo lyomathimbo omanene sho ya hingi ye li kohi yomalovu.
Okwa li woo a londodha aakwashigwana kutya inaya thiga omagumbo gawo kage li metonatelo ngele otaya yi koondoolopa dhilwe oshoka ookalyamupombo otaya vulu okulongitha ompito ndjoka okuteya omagumbo ga wo.
Shikongo okwa gwedha ta ti, aayendinandjila oshowo ooyene yiihauto inaya thiga iinima yongushu moohauto oshoka otashi nana oombudhi dhi teye oohauto e taya yo ya kuthamo shoka shi li mo.
”Kehe omukwashigwana na kale ena oonomola dhopolisi yi li popepi naye, opo a vulu okulopota iimbuluma tayi holoka nenge a vule okulopota omayinyengo ga puka,” Shikongo a kumagidha.